റാന്നി : വായിലേറ്റ മുറിവു മൂലം തീറ്റയെടുക്കാന് കഴിയാതിരുന്നതാണ് കുരുമ്പന്മൂഴി പൊനച്ചി ഭാഗത്തു കണ്ട കാട്ടാന ചരിയാന് കാരണമെന്ന് പോസ്റ്റുമോര്ട്ടം റിപ്പോര്ട്ട്. ജനവാസ മേഖലയോടു ചേര്ന്ന് സാമൂഹ്യ വിരുദ്ധര് കാട്ടുപന്നിയെ പിടിക്കാന് വെച്ച പടക്കം കടിച്ചതു മൂലമുണ്ടായതാകാം മുറിവെന്നാണ് നിഗമനം. കഴിഞ്ഞ ഒരു വര്ഷമായി ഈ ആന ജനവാസ മേഖലകളിലെ നിത്യ സന്ദര്ശകനായിരുന്നു. കാടിറങ്ങുന്ന ആന കിലോമീറ്ററുകളോളം ദൂരത്തില് എത്തി നാട്ടില് കൃഷി നശിപ്പിച്ചിരുന്നു.
ആന സ്ഥിരമായി ജനവാസ മേഖലകളിലെ കൃഷിയിടങ്ങളില് എത്തി നാശം വിതയ്ക്കുന്നതില് വനം വകുപ്പിനെതിരെ ജനരോഷവും ശക്തമായിരുന്നു. ഒരാഴ്ച മുമ്പും കുരുമ്പന്മൂഴി, ഇടത്തിക്കാവ് മേഖലകളില് ആന എത്തിയിരുന്നു. അന്ന് കാടിറങ്ങിയ ആന വീടിന്റെ മതിലും തെങ്ങും മറിച്ചിട്ട ശേഷം വളര്ത്തുമൃഗങ്ങളെ ആക്രമിക്കാനും ശ്രമിച്ചിരുന്നു. തിങ്കളാഴ്ച ഉച്ചയോടെയാണ് പനംകുടന്ത പൊനച്ചി ഭാഗത്ത് ചരിവുള്ളിടത്ത് ഉരുണ്ടു വന്ന രീതിയില് ആനയെ കണ്ടെത്തിയത്. ചൊവ്വാഴ്ച വനം വകുപ്പിന്റെ കോന്നി സ്ക്വാഡിലെ സര്ജന് ഡോ.ശ്യാംചന്ദ്രന്റെ നേതൃത്വത്തില് പോസ്റ്റുമോര്ട്ടം നടത്തിയാണ് ആനയെ അതേ സ്ഥലത്ത് സംസ്ക്കരിച്ചത്.
രണ്ടാഴ്ചയിലേറെയായി ആന തീറ്റയെടുത്തിട്ടില്ലെന്നാണ് നിഗമനം. മുറിവിന്റെ രീതിയും പഴക്കവും കണ്ടെത്താന് ഫോറന്സിക് പരിശോധനയും നടത്തി. അസ്വാഭാവിക രീതിയില് ആന ചരിഞ്ഞതിന് വനംവകുപ്പ് കേസെടുത്ത് അന്വേക്ഷണം ആരംഭിച്ചിട്ടുണ്ട്. ആനയുടെ ജഢം ഇന്നു കൊണ്ടാണ് പൂര്ണ്ണമായും കത്തിയമര്ന്നത്. അതിനാല് വിശദമായ അന്വേക്ഷണം ആരംഭിച്ചില്ലെന്നും റിപ്പോര്ട്ട് കോടതിക്കു കൈമാറിയതായും കണമല സ്റ്റേഷന് ഡെപ്യൂട്ടി ഡയറക്ടര് ഷാജിമോന് പറഞ്ഞു.
