മലപ്പുറം : മുതുമല ആന ക്യാംപില് പുതിയ ആനകള്ക്ക് കുങ്കിയാനയാകാനുള്ള പരിശീലനം തുടങ്ങി. തെപ്പക്കാട് ആന ക്യാംപിലെ ഗിരി, രഘു, ബൊമ്മി, മസിനി എന്നീ ആനകള്ക്കാണ് പരിശീലനം നല്കുന്നത്. കുങ്കിയാനകളായ വസീം, ബൊമ്മന്, ഉദയന് എന്നി ആനകളെ ഉപയോഗിച്ചാണ് പാപ്പാന്മാര് ഇവര്ക്ക് പരിശീലനം നല്കുന്നത്.ഗിരി എന്ന ആനയെ വണ്ടലൂര് മൃഗശാലയില് നിന്നാണ് തെപ്പാക്കാട് ആന ക്യാംപിലേക്ക് മാറ്റിയത്.
ഓസൂരില് അമ്മയെ പിരിഞ്ഞ് അവശ നിലയില് കാണാനിടയായിട്ടാണ് രഘു എന്ന ആനയെ ക്യാംപിലെത്തിച്ചത്. സത്യമംഗലം വനത്തില് നിന്ന് അമ്മ നഷ്ടപ്പെട്ട് ഗ്രാമത്തിലെത്തിയതാണ് 2 വയസ്സുള്ള ബൊമ്മി. ശ്രീരംഗം ക്ഷേത്രത്തിലായിരുന്ന മസിനിയെ ചെന്നൈ കോടതി ഇടപെട്ടാണ് തെപ്പക്കാടെത്തിച്ചത്. നാട്ടിലിറങ്ങുന്ന കാട്ടാനകളെ വനത്തിലേക്ക് തുരത്താനുള്ള പരിശീലനമാണ് പ്രധാനമായും നല്കുന്നത്. കാട്ടാനകളെ പിടിക്കുമ്ബോള് വടം കഴുത്തില് കെട്ടുക, കൊട്ടിലിലേക്കു മാറ്റുക, തടികള് വലിച്ചുമാറ്റുക എന്നിവയ്ക്കും ലോറിയില് കയറാനും പരിശീലനം നല്കും. പ്രായക്കുറവുളളതിനാല് ബൊമ്മിക്ക് മണിയടിക്കുക, മുട്ടുകുത്തുക തുടങ്ങിയ ചെറിയ പരിശീലനമാണ് നല്കുന്നത്.