റാന്നി : നന്മയുടെയും സാന്ത്വനത്തിന്റെയും ഉദാത്ത മാതൃകയിലൂടെ അനശ്വരയായ ആലിൻ ഷെറിൻ എബ്രഹാമിന്റെ ജീവിത നന്മയുടെ പാഠം പുതുയുഗ പാഠമായി മനസ്സിൽ എഴുതി ചേർത്ത് എണ്ണൂറാം വയൽ സി.എം.എസ് സ്കൂളിൽ കുരുന്നുകളുടെ ആദ്യ ദിനം. അഞ്ചു കുരുന്നുകളെ ജീവിതത്തിലേക്ക് കൈ പിടിച്ചു നടത്തി യാത്രയായ കുഞ്ഞു മാലാഖ ആലിൻ ഷെറിൻ എബ്രഹാമിന്റെ ദീപ്ത സ്മരണകൾ മിഴിവേകിയ അനർഘ നിമിഷങ്ങളിലൂടെ വിദ്യാലയത്തിലെ ആദ്യ ദിനത്തിലേക്ക് പിച്ചവെച്ച് കുരുന്നുകൾ. വിദ്യാലയ മുറ്റത്ത് എത്തിയ നവാഗതരെ വരവേറ്റത് ആലിന്റെ രൂപത്തിലുള്ള വലിയ മാലാഖയും കുട്ടികളുടെ രൂപങ്ങളുമായിരുന്നു. വിസ്മയ കാഴ്ചയിൽ അമ്പരന്ന് നിന്ന കുരുന്നുകളുടെ കരം പിടിച്ച് മാലാഖ കുഞ്ഞും കൂട്ടുകാരും വിദ്യാലയത്തിന്റെ പടി കടന്നെത്തി.
ബലൂണുകളും കളിപ്പാട്ടങ്ങളും മധുര പലഹാരങ്ങളും നൽകി നവാഗതരെ അധ്യാപകരും മുതിർന്ന വിദ്യാർത്ഥികളും ചേർന്ന് സ്വീകരിച്ചു. വിദ്യാലയത്തിലൊരുക്കിയ വർണ്ണക്കാഴ്ചകൾ കുട്ടികളിൽ അമ്പരപ്പും ആഹ്ലാദവുമാണ് നിറച്ചത്. കുട്ടികൾക്ക് കളിക്കുവാൻ തയ്യാറാക്കിയ ഇൻഫ്ലാറ്റബിൾ മിക്കി മൗസ് ജൂലാ, ബോൻസി ബലൂൺ, ചിൽഡ്രൻസ് പാർക്ക് എന്നിവ മുഖ്യ ആകർഷണമായി. ആടിയും പാടിയും നൃത്തം ചെയ്തും കുട്ടികൾ തങ്ങളുടെ ആദ്യ ദിനം ആഘോഷമാക്കി.
സപ്ലൈ കോ പുറത്തിറക്കിയ ആലിൻ നോട്ട് ബുക്കുകൾ കുട്ടികൾക്ക് സമ്മാനമായി നൽകി. പ്രവേശനോത്സവം ബ്ലോക്ക് പഞ്ചായത്ത് വിദ്യാഭ്യാസ ആരോഗ്യ സ്ഥിരം സമിതി അധ്യക്ഷ മേഴ്സി ഫിലിപ്പ് ഉദ്ഘാടനം ചെയ്തു. സ്കൂൾ ലോക്കൽ മാനേജർ റവ. ജോൺസൺ അലക്സാണ്ടർ അധ്യക്ഷത വഹിച്ചു. ഗ്രാമ പഞ്ചായത്ത് പ്രസിഡന്റ് എസ് രമാദേവി മുഖ്യ പ്രഭാഷണം നടത്തി. ഗ്രാമപഞ്ചായത്ത് അംഗം ഷാജി കൈപ്പുഴ, പി ടി എ പ്രസിഡന്റ് ഷൈനു ചാക്കോ, മാനേജ്മെന്റ് കമ്മറ്റി ഭാരവാഹികളായ സാം എബ്രഹാം, പി.ടി മാത്യു, ജോജി തോമസ് വർക്കി, വർഗീസ് ശീമോൻ, സെലിൻ പി.രാജൻ എന്നിവർ പ്രസംഗിച്ചു.
