കോന്നി : പരിസ്ഥിതി ദിനത്തിൽ വിവിധ പഞ്ചായത്തുകൾക്ക് വിതരണം ചെയ്യുന്നതിനായി കോന്നി സോഷ്യൽ ഫോറെസ്ട്രിയുടെ നേതൃത്വത്തിൽ വൃക്ഷ തൈകൾ ഒരുങ്ങി. മണ്ണീറ ഫോറെസ്റ്റേഷനടുത്ത് പ്രത്യേകം തയ്യാറാക്കിയ സ്ഥലത്താണ് വൃക്ഷ തൈകൾ ഉത്പാദിപ്പിച്ചിരിക്കുന്നത്. മുൻ വർഷങ്ങളിൽ വനം വകുപ്പ് സോഷ്യൽ ഫോറെസ്ട്രി നേരിട്ട് തൈകൾ ഉദ്പാതിപ്പിച്ചാണ് പഞ്ചായത്തുകൾക്ക് വിതരണം ചെയ്തിരുന്നത്. എന്നാൽ ഇത്തവണ ഇതിൽ നിന്നും വ്യത്യസ്തമായി സംസ്ഥാനത്ത് ഉടനീളം തൊഴിലുറപ്പ് പദ്ധതിയിൽ ഉൾപ്പെടുത്തിയാണ് തൈകൾ തയ്യാറാക്കുന്നത്.
പാകുന്നതിനാവശ്യമായ വിത്തും മറ്റ് സാങ്കേതിക സഹായങ്ങളും വനം വകുപ്പ് നൽകും. എന്നാൽ തൊഴിലാളികളുടെ കൂലി ഉൾപ്പെടെഉള്ള കാര്യങ്ങൾ തൊഴിലുറപ്പ് പദ്ധതിയിലാണ് ഉൾപ്പെടുക. വിവിധ പഞ്ചായത്തുകളിലായി 20000 തൈകളും ഓരോ പഞ്ചായത്തുകൾക്കും 500 വിത്തുകൾ വീതവും നൽകും. 2021 ഡിസംബർ 22 നാണ് തൈകൾ ഉത്പാദിപ്പിക്കുന്ന ജോലികൾ ആരംഭിച്ചത്. കുടംപുളി, ഗന്ധപാല, നെല്ലി, പേര, സീതപ്പഴം, രക്ത ചന്ദനം, പൂവരശ്, കണിക്കൊന്ന,ചന്ദനം തുടങ്ങിയ തൈകളാണ് ഇപ്പോൾ ഉത്പാദിപിച്ചിരിക്കുന്നത്. സംസ്ഥാനത്ത് ഉടനീളമുള്ള പദ്ധതിയിൽ പത്തനംതിട്ട ജില്ലയിലാണ് തൈകൾ വളരെ നേരത്തെ ഉത്പാദിപ്പിച്ചിരിക്കുന്നത്.