തിരുവനന്തപുരം: ഇ.പി ജയരാജനെതിരായ വധശ്രമക്കേസില് മൊഴി നല്കാന് പോലീസ് സ്റ്റേഷനില് ഹാജരാകില്ലെന്ന് യൂത്ത് കോണ്ഗ്രസ് പ്രവര്ത്തകര്. മുഖ്യമന്ത്രിക്കെതിരായ വധശ്രമക്കേസിലെ പ്രതികള് കൂടിയായ ഫര്സീന് മജീദും നവീന് കുമാറുമാണ് മൊഴി നല്കാന് വരില്ലെന്ന് തിരുവനന്തപുരം വലിയതുറ എസ്.എച്ച്.ഒയെ അറിയിച്ചത്. മുഖ്യമന്ത്രിക്കെതിരായ വധശ്രമക്കേസില് തിരുവനന്തപുരം ജില്ലയില് പ്രവേശിക്കരുതെന്ന് ജാമ്യം നല്കുമ്പോള് കോടതി നിര്ദേശിച്ചിരുന്നു.
ജാമ്യ വ്യവസ്ഥകള് നിലനില്ക്കുന്നതിനാല് തിരുവനന്തപുരത്തേക്ക് വരാനാകില്ലെന്നാണ് വിശദീകരണം. ചൊവ്വ, ബുധന് ദിവസങ്ങളിലായി ഹാജരാകാനായിരുന്നു നോട്ടീസ്. വീട്ടിലെത്തി മൊഴിയെടുക്കാമെന്ന് ഇരുവരും അറിയിച്ചിട്ടുണ്ട്. ഇ.പി ജയരാജന് നല്കിയ പരാതിയുടെ അടിസ്ഥാനത്തിലാണ് യൂത്ത് കോണ്ഗ്രസ് പ്രവര്ത്തകരെ മൊഴി രേഖപ്പെടുത്താന് വിളിച്ചത്.
മുഖ്യമന്ത്രിക്കെതിരെ വിമാനത്തില് പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ കൈയേറ്റം ചെയ്ത സംഭവത്തില് വധശ്രമം, മനഃപൂര്വമല്ലാത്ത നരഹത്യാ ശ്രമം, ഗൂഢാലോചന, ഭീഷണിപ്പെടുത്തല് എന്നീ കുറ്റങ്ങള് ചുമത്തി തിരുവനന്തപുരം വലിയതുറ പൊലീസ് ഇ.പി ജയരാജനെതിരെ കേസെടുത്തിരുന്നു. തിരുവനന്തപുരം ചീഫ് ജുഡീഷ്യല് മജിസ്ട്രേറ്റ് കോടതിയുടെ ഉത്തരവിന്റെ അടിസ്ഥാനത്തിലാണ് കേസ്. മുഖ്യമന്ത്രിയുടെ ഗണ്മാന് അനില്കുമാര്, പി.എ സുനീഷ് എന്നിവര്ക്കെതിരെയും കേസെടുത്തിട്ടുണ്ട്. വിമാനത്തിലുണ്ടായ സംഘര്ഷത്തില് ഇന്ഡിഗോ എയര്ലൈന്സ് ജയരാജന് മൂന്നാഴ്ചത്തെയും യൂത്ത് കോണ്ഗ്രസ് പ്രവര്ത്തകര്ക്ക് രണ്ടാഴ്ചത്തെയും വിലക്ക് ഏര്പ്പെടുത്തിയിരുന്നു.
