കല്പറ്റ : മേപ്പാടി ഗ്രാമപഞ്ചായത്ത് വാര്ഡ് 19ല് പ്രവര്ത്തിക്കുന്ന ടാര് മിക്സിങ് യൂണിറ്റിന് പ്രവര്ത്തനാനുമതി നല്കുന്ന വ്യാജ ലൈസന്സ് നിര്മിച്ച് നല്കിയ ക്ലര്ക്ക് അറസ്റ്റില്. പഞ്ചായത്ത് ലൈസന്സ് വിഭാഗത്തിലെ സീനിയര് ക്ലര്ക്ക് കൊടുവള്ളി വാവാട് മെട്ടമ്മല് വീട്ടിലെ കെ.എ. ജിയാസി(42)നെയാണ് മേപ്പാടി എസ്.ഐ സിറാജും സംഘവും അറസ്റ്റ് ചെയ്തത്. പഞ്ചായത്ത് സെക്രട്ടറിയുടെ പരാതിയുടെ അടിസ്ഥാനത്തിലാണ് കേസ് രജിസ്റ്റര് ചെയ്തത്. ടാര് മിക്സിങ് യൂണിറ്റിന്റെ ലൈസന്സ് കാലാവധി മൂന്ന് മാസമാണ്. ഇതിന് 12500 രൂപയാണ് ഫീസായി പഞ്ചായത്തിന് നല്കേണ്ടത്.
പഞ്ചായത്ത് അറിയാതെ ലൈസന്സ് നല്കി ഈ തുക ജിയാസ് കൈക്കൂലിയായി സ്വീകരിക്കുകയായിരുന്നു. സെക്രട്ടറിയുടെ ഒപ്പ് ജിയാസ് സ്വയം ഇടുകയായിരുന്നു. പ്രതിയുടെ ഭാര്യാ വീട്ടില് നിന്ന് തിങ്കളാഴ്ച പുലര്ച്ചയാണ് ഇയാളെ അറസ്റ്റ് ചെയ്തത്. എസ്.സി.പി.ഒ നജീബ്, സി.പി.ഒമാരായ പ്രശാന്ത്, ശ്രീജിത്ത്, സാഹിര് അഹമ്മദ്, ഫൈറൂസ് എന്നിവര് സംഘത്തിലുണ്ടായിരുന്നു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
