റാന്നി: സാമൂഹ്യ മാധ്യമങ്ങളിലൂടെ ബാങ്കിനെതിരെ അസിസ്റ്റന്റ് കൃഷി ഓഫീസർ വ്യാജ പ്രചരണം നടത്തി അപകീർത്തിപ്പെടുത്തിയെന്ന പരാതിയിൽ ഒരു ലക്ഷം രൂപ നഷ്ടപരിഹാരം നൽകാൻ കോടതി വിധി. വെച്ചൂച്ചിറ കൃഷി ഭവൻ ഉദ്യോഗസ്ഥൻ മുക്കൂട്ടുതറ പമ്പാവാലി സ്വദേശി കല്ലുറുമ്പിൽ ഷിജുവിനാണ് കാഞ്ഞിരപ്പള്ളി മുൻസിഫ് കോടതി ഒരു ലക്ഷം രൂപ പിഴ ചുമത്തിയത്. കണമല സർവീസ് സഹകരണ ബാങ്കിനെയും ഭരണസമിതിയേയും ജീവനക്കാരേയും സമൂഹമാധ്യമങ്ങളിലൂടെയും മറ്റു രീതിയിലും അപകീർത്തിപ്പെടുത്തിയെന്ന കേസിലാണ് പിഴ. ബാങ്കിന്റെയോ ഭരണസമിതി അംഗങ്ങളുടെയോ ജീവനക്കാരുടെയോ സത്പേരിന് ദോഷമുണ്ടാക്കുന്ന യാതൊരു പ്രവൃത്തികളും ഇനി മേലിൽ ചെയ്യാൻ പാടില്ലെന്നും ഇതോടൊപ്പം കാഞ്ഞിരപ്പള്ളി മുൻസിഫ് ഷെറിൻ കെ. ജോർജ് ഉത്തരവിട്ടിട്ടുണ്ട്. സാമൂഹ്യ മാധ്യമങ്ങളിലൂടെ നിരന്തരമായി വ്യാജ വാർത്തകൾ നൽകിയതിനെതിരെ ബാങ്ക് ഭരണസമിതി നൽകിയ കേസിലാണ് കോടതിയുടെ ഉത്തരവ്.
