സുല്ത്താന് ബത്തേരി :വ്യാജ ആര്.ടി.പി.സി.ആര് സര്ട്ടിഫിക്കറ്റുമായി കടന്ന മലയാളികളെ കണ്ടെത്താന് കര്ണാടക പോലീസിന്റെ തിരച്ചില്. വ്യാജ ആര്.ടി.പി.സി.ആര് നെഗറ്റിവ് സര്ട്ടിഫിക്കറ്റുമായി ഗുണ്ടല്പേട്ടിലെ മൂലഹള്ള ചെക്ക്പോസ്റ്റ് കടന്നതിന് കോഴിക്കോട് സ്വദേശികളായ നാലുപേര്ക്കെതിരെ കേസെടുത്തു. വിജയ്, ജയപ്രകാശ്, സന്തോഷ്, വിജയന് എന്നിവര്ക്കെതിരെയാണ് ഗുണ്ടല്പേട്ട് പോലീസ് കേസെടുത്തത്. കര്ണാടകയിലേക്കു കടക്കാനായി കഴിഞ്ഞ ദിവസം ഇവര് സമര്പ്പിച്ച സര്ട്ടിഫിക്കറ്റുകളിലെ ഐ.ഡി നമ്പറുകള് വ്യാജമാണെന്ന് കണ്ടെത്തിയിരുന്നു. കര്ണാടകയിലേക്ക് പോകാന് രണ്ടു ദിവസത്തിനുള്ളില് എടുത്ത ആര്.ടി.പി.സി.ആര് നെഗറ്റിവ് സര്ട്ടിഫിക്കറ്റാണ് വേണ്ടത്. രണ്ടു ഡോസ് വാക്സിന് സ്വീകരിച്ചവരായാലും ഇതു വേണം. പെട്ടെന്ന് തിരിച്ചറിയാന് കഴിയാത്ത രീതിയില് സര്ട്ടിഫിക്കറ്റുകള് തയാറാക്കിയാണ് ഏതാനും യുവാക്കള് അതിര്ത്തി കടന്നിട്ടുള്ളതെന്ന് മൂലഹള്ള ചെക്ക്പോസ്റ്റ് അധികൃതര് പറയുന്നു. ഇവരെ പോലീസ് തിരഞ്ഞുകൊണ്ടിരിക്കുകയാണ്.
