തിരുവനന്തപുരം : കൃഷി നാശത്തെ തുടര്ന്നുണ്ടായ കടബാധ്യതയില് നെല്ക്കര്ഷകന് ആത്മഹത്യ ചെയ്ത സംഭവത്തില് പ്രതികരിച്ച് കൃഷി മന്ത്രി പി.പ്രസാദ്. കര്ഷകന്റെ ആത്മഹത്യ വേദനിപ്പിക്കുന്നതെന്ന് മന്ത്രി പി.പ്രസാദ് പറഞ്ഞു. കൃഷി നശിച്ച കര്ഷകര്ക്ക് കഴിയുന്നത്ര സഹായം നല്കും. ഇതിനായി അടിയന്തര യോഗം ചേരുകയാണ്. കാര്ഷിക മേഖലയില് സര്ക്കാര് സംരക്ഷണം ഉറപ്പാക്കും. ആര്ക്കും ആത്മഹത്യ ചെയ്യേണ്ട സാഹചര്യം നിലവിലില്ലെന്നും മന്ത്രി പി.പ്രസാദ് മാധ്യമങ്ങളോട് പറഞ്ഞു. കൃഷി നാശത്തെ തുടര്ന്നാണ് തിരുവല്ല നിരണത്ത് നെല്ക്കര്ഷകനായ വടക്കുംഭാഗം കാണാത്ര പറമ്പ് വീട്ടില് രാജീവന് ഇന്നലെ ആത്മഹത്യ ചെയ്തത്. രാജീവന് പാട്ടത്തിനെടുത്ത് കൃഷി ചെയ്യുന്ന പാടശേഖരത്തിന് സമീപത്തെ പുരയിടത്തിലെ മരക്കൊമ്പിലാണ് തൂങ്ങി മരിച്ചത്.
കൃഷി ആവശ്യത്തിനായി രാജീവന് ബാങ്കുകളില് നിന്നും അയല് കൂട്ടങ്ങളില് നിന്നും വായ്പ എടുത്തിരുന്നു. കഴിഞ്ഞ വര്ഷത്തെ വേനല് മഴ മൂലം കൃഷി നശിച്ച് രാജീവിന് ലക്ഷങ്ങളുടെ നഷ്ടമുണ്ടായിരുന്നു. സര്ക്കാര് ധനസഹായമായി നാമമാത്രമായ തുക മാത്രമാണ് ലഭിച്ചത്. ഇതിനെതിരെ രാജീവ് അടക്കം 10 കര്ഷകര് ഹൈകോടതിയില് റിട്ട് ഹര്ജി ഫയല് ചെയ്തിരുന്നു. ഈ വര്ഷവും 10 ഏക്കറോളം നെല്വയല് പാട്ടത്തിനെടുത്ത് കൃഷി ആരംഭിച്ചെങ്കിലും ഇക്കുറിയും മഴ ചതിച്ചു. വായ്പ തുക തിരിച്ചടക്കാന് കഴിയില്ലെന്ന് ബോധ്യപ്പെട്ടതിന്റെ അടിസ്ഥാനത്തിലാണ് അത്മഹത്യയെന്നാണ് ലഭിക്കുന്ന പ്രാഥമിക വിവരം.
