കാസര്‍കോട് : ഫാഷന്‍ ഗോള്‍ഡ് പണം നിക്ഷേപ തട്ടിപ്പു കേസില്‍ കമ്പനിയും ഡയറക്ടര്‍ ബോര്‍ഡ് അംഗങ്ങളും പ്രതികളായേക്കും. ഡയറക്ടര്‍ ബോര്‍ഡ് അംഗങ്ങളെ പ്രതിയാക്കുന്നത് അന്വേഷണത്തിന്റെ വേഗത വര്‍ധിപ്പിക്കുമെന്നാണ് ക്രൈംബ്രാഞ്ച് നിരീക്ഷിക്കുന്നത്. അതിനുള്ള നിയമവശങ്ങള്‍ ക്രൈംബ്രാഞ്ച് പരിശോധിച്ചുവരുകയാണ്. അങ്ങനെയെങ്കില്‍ പല ഘട്ടങ്ങളിലായി ഡയറക്ടര്‍ ബോര്‍ഡ് അംഗങ്ങളായിരുന്ന 20ഓളം പേര്‍ പ്രതികളാകും. കേസ് ഒത്തുതീര്‍പ്പാക്കാനുള്ള ഉത്തരവാദിത്തം ഇവരിലേക്ക് വന്നുചേരും. 176 കേസുകള്‍ നാലു യൂണിറ്റുകളിലായാണ് ക്രൈംബ്രാഞ്ച് അന്വേഷിക്കുന്നത്. തിരുവനന്തപുരം സ്വര്‍ണക്കടത്ത് വിവാദങ്ങള്‍ക്ക് തടയിടാന്‍ സര്‍ക്കാര്‍ ഇടപെട്ട് തയാറാക്കിയ കേസ് എന്ന് ആരോപണം ഉയര്‍ന്ന ഫാഷന്‍ ഗോള്‍ഡ് കേസ് ക്രൈം ബ്രാഞ്ചിന്റെ കോഴിക്കോടുവരെയുള്ള യൂണിറ്റിനെ വട്ടംകറക്കിക്കൊണ്ടിരിക്കുകയാണ്. നാലുപേര്‍ പ്രതികളായ കേസില്‍ രണ്ടുപേര്‍ മാത്രമാണ് അറസ്റ്റിലായത്. ഡയറക്ടര്‍മാരെ രക്ഷിക്കാനാണ് സര്‍ക്കാര്‍ നീക്കം. എന്നാല്‍ ക്രൈംബ്രാഞ്ച് അതിനെതിരുമാണ്.
176 കേസുകളില്‍ ഓരോന്നിനും കമ്പനിയുമായി ബന്ധപ്പെട്ട് ബോര്‍ഡ് അംഗങ്ങള്‍ നടത്തിയ ഇടപാടുകള്‍, വയനാട്, ബംഗളൂരു എന്നിവിടങ്ങളിലെ ഭൂമി ഇടപാടുകള്‍, നികുതി, ഇ.പി.എഫ് രേഖകള്‍, ജീവനക്കാരുടെ സേവന – വേതന വ്യവസ്ഥകള്‍ എന്നിങ്ങനെയുള്ള രേഖകള്‍ അന്വേഷണ സംഘം ശേഖരിച്ചുവരുകയാണ്. കേസ് ഒത്തുതീര്‍പ്പാക്കാനുള്ളള ശ്രമവും നടക്കുന്നുണ്ട്. എന്നാല്‍ പ്രതിചേര്‍ക്കപ്പെട്ടവര്‍ ഒത്തുതീര്‍പ്പിന് തയാറാവാത്തതോടെ ബോര്‍ഡ് അംഗങ്ങളെ കൂടി പ്രതിചേര്‍ത്ത് കേസിന്റെ ദിശ മാറ്റാനാണ് ക്രൈംബ്രാഞ്ച് നീക്കം. സ്വന്തം നിലയില്‍ ജ്വല്ലറിയില്‍നിന്ന് സ്വര്‍ണം എടുത്തുകൊണ്ടുപോയ നാലു ഡയറക്ടര്‍മാര്‍ക്കെതിരെ ജില്ല പോലിസ് മേധാവിക്ക് നല്‍കിയ പരാതിയില്‍ കേസെടുത്തിരുന്നില്ല. ഈ കേസ് രജിസ്റ്റര്‍ ചെയ്യുന്നതിനെ കുറിച്ചും ആലോചനയുണ്ട്.
