കാസര്ഗോഡ് : ഫാഷന് ഗോള്ഡ് നിക്ഷേപ തട്ടിപ്പ് സംഭവത്തില് എം.സി കമറുദ്ദീന് എം.എല് എയെ കുടുക്കാന് കാഞ്ഞങ്ങാട്ടെ പ്രമുഖ അഭിഭാഷകന് ഗുഢാലോചന നടത്തിയതായി നിക്ഷേപകന്റെ വെളിപ്പെടുത്തല്. എം.സി കമറുദ്ദീന് ജാമ്യം ലഭിക്കാതിരിക്കാന് പല സമയങ്ങളിലായി പരാതി നല്കാന് നിക്ഷേപകരെ അഭിഭാഷകന് നിര്ബന്ധിച്ചിരുന്നതായാണ് ആരോപണം. പരാതി നല്കിയ നിക്ഷേപകനാണ് വിവരം വെളിപ്പെടുത്തിയത്.
സി.പിഎം സഹയാത്രികനായ കാഞ്ഞങ്ങാട്ടെ അഭിഭാഷകന് ഫാഷന് ഗോള്ഡ് നിഷേപ തട്ടിപ്പ് കേസില് പോലീസില് പരാതി നല്കാന് സമ്മര്ദ്ദം ചെലുത്തിയതായി നിക്ഷേപകര് പറയുന്നു. നിക്ഷേപകരും ഡയറക്ടര്മാരും അടങ്ങുന്ന ആക്ഷന് കമ്മറ്റിയുടെ നേതൃത്വത്തില് പ്രശ്ന പരിഹാരത്തിനുള്ള ശ്രമം തുടരുന്നതിനിടെയാണ് അഭിഭാഷകന് പരാതി നല്കാന് പേരിപ്പിച്ചത്.
കേസുകളുടെ എണ്ണം കൂട്ടാനായി ഒരു കുടുംബത്തിലെ തന്നെ നിക്ഷേപകരോട് വ്യത്യസ്ത പരാതികള് നല്കാന് അഭിഭാഷകന് നിര്ദ്ദേശിച്ചു. അറസ്റ്റിന് ശേഷവും പുതിയ കേസുകള് കൊടുക്കാന് നേരത്തെ തന്നെ പരാതികള് തയ്യാറാക്കിയിരുന്നതായും നിക്ഷേപകര് പറയുന്നു.
മുഴുവന് കേസുകളിലും ജാമ്യം ലഭിച്ചാല് രണ്ട് ദിവസങ്ങള്ക്കകം കമറുദ്ദീന് പുറത്തിറങ്ങാനാവും. ഇത് തടയാനായി വീണ്ടും പരാതി കൊടുപ്പിക്കാന് നീക്കം നടത്തിയതാണ് നിക്ഷേപകര് അഭിഭാഷകനെതിരെ തിരിയാന് കാരണം. കേസിലെ മുഖ്യ പ്രതിയെ രക്ഷപ്പെടുത്തി എം.എല്.എ മാത്രം കുടുക്കി രാഷ്ട്രീയ നേട്ടമുണ്ടാക്കാനുള്ള നീക്കത്തിനെതിരെ പ്രതിഷേധത്തിനൊരുങ്ങുകയാണ് നിക്ഷേപകര്.
