ദുബായ് : ദുബായിലെ ശൈഖ് സായിദ് റോഡിലുള്ള ഒരു റെസ്റ്റോറന്റിൽ തിങ്കളാഴ്ച രാവിലെ ഉണ്ടായ തീപിടിത്തം മൂന്ന് മണിക്കൂറിലധികം നീണ്ട അഗ്നിശമന പ്രവർത്തനത്തിനൊടുവിൽ നിയന്ത്രണവിധേയമാക്കി. അപകടത്തിൽ ആർക്കും പരിക്കേറ്റിട്ടില്ലെന്ന് ദുബായ് സിവിൽ ഡിഫൻസ് അറിയിച്ചു. രാവിലെ 7.42-നാണ് തീപിടിത്തത്തെക്കുറിച്ചുള്ള അടിയന്തര സന്ദേശം ദുബായ് സിവിൽ ഡിഫൻസിന്റെ ഓപ്പറേഷൻസ് റൂമിൽ ലഭിച്ചത്. ഉടൻ തന്നെ അൽ ഇത്തിഹാദ് ഫയർ സ്റ്റേഷനിൽ നിന്നുള്ള അഗ്നിശമന സേനാംഗങ്ങൾ സ്ഥലത്തേക്ക് പുറപ്പെടുകയും രാവിലെ 7.48-ന് സംഭവസ്ഥലത്തെത്തി രക്ഷാപ്രവർത്തനം ആരംഭിക്കുകയും ചെയ്തു.
മുൻകരുതൽ നടപടിയുടെ ഭാഗമായി കെട്ടിടത്തിലുണ്ടായിരുന്ന എല്ലാവരെയും സുരക്ഷിതമായി ഒഴിപ്പിച്ചതിനാൽ ആളപായം ഒഴിവാക്കാനായി. തുടർന്ന് വിവിധ സംഘങ്ങൾ ഏകോപിതമായി നടത്തിയ അഗ്നിശമന പ്രവർത്തനങ്ങൾക്കൊടുവിൽ രാവിലെ 10.50-ഓടെ തീ പൂർണമായും നിയന്ത്രണവിധേയമായതായി ഇൻസിഡന്റ് കമാൻഡർ സ്ഥിരീകരിച്ചു. തീപിടിത്തത്തിന് പിന്നാലെ അവശേഷിക്കുന്ന പുകയും കനലും പൂർണമായും ഇല്ലാതാക്കി തീ വീണ്ടും പടരാതിരിക്കാൻ കൂളിംഗ് ഓപ്പറേഷൻസ് തുടരുകയാണ്. ഈ നടപടികൾ പൂർത്തിയായ ശേഷം നിയമാനുസൃത തുടർനടപടികൾക്കായി സ്ഥലം ബന്ധപ്പെട്ട അധികാരികൾക്ക് കൈമാറുമെന്ന് ദുബായ് സിവിൽ ഡിഫൻസ് അറിയിച്ചു.
