ആന്ധ്രാപ്രദേശ് : ആന്ധ്രാപ്രദേശിലെ പ്രകാശം ജില്ലയിലെ ഓംഗോള് പട്ടണത്തിലുണ്ടായ വന് തീപിടിത്തത്തില് ഒമ്പതോളം വോള്വോ ബസുകള് പൂര്ണമായും കത്തിനശിച്ചതായി പോലീസ് അറിയിച്ചു. ചൊവ്വാഴ്ച, ഓംഗോള് അര്ബന് ഡെവലപ്മെന്റ് അതോറിറ്റി കോംപ്ലക്സിന് സമീപം സ്വകാര്യ ട്രാവല് ഓപറേറ്റര്മാര് വാഹനങ്ങള് പാര്ക്ക് ചെയ്ത സ്ഥലത്താണ് സംഭവം.
അഗ്നിശമന സേനാംഗങ്ങള് ആറ് ഫയര് എന്ജിനുകളുടെ സഹായത്തോടെ തീയണച്ചു. തീ അണയ്ക്കാന് നഗരസഭാ അധികൃതരും വാടര് ടാങ്കറുകള് എത്തിച്ചു. തീപിടിത്തത്തിന്റെ കാരണം അറിവായിട്ടില്ല. സംഭവത്തില് പോലീസ് അന്വേഷണം ആരംഭിച്ചിട്ടുണ്ട്. ബസുകളില് നിന്ന് വലിയ തീ പടര്ന്നത് സമീപ പ്രദേശങ്ങളിലുള്ളവരെ പരിഭ്രാന്തിയിലാഴ്ത്തി.
പ്രദേശത്ത് പാര്ക്ക് ചെയ്തിരുന്ന മറ്റ് 20 ബസുകളിലേക്ക് തീ പടരുന്നത് അഗ്നിശമനസേന തടഞ്ഞതായി ഒരു പോലീസ് ഉദ്യോഗസ്ഥന് പറഞ്ഞു. കത്തിനശിച്ച ബസുകളെല്ലാം കാവേരി ട്രാവല്സിന്റെതാണ്. ആറ് കോടി രൂപയുടെ നഷ്ടം കണക്കാക്കുന്നുവെന്നാണ് പ്രാഥമിക നിഗമനം. കോവിഡ് പാന്ഡെമിക് മൂലം ഓട്ടം കുറഞ്ഞതിനാല് ബസുകള് അവിടെ പാര്ക്ക് ചെയ്തിരുന്നതാണെന്ന് ഓപറേറ്റര് പറഞ്ഞു.
