മൈസൂരു: കുർക്കുറെ പാക്കറ്റിനൊപ്പം ലഭിച്ച ചെറിയ പ്ലാസ്റ്റിക് കളിപ്പാട്ടം വിഴുങ്ങിയതിനെ തുടർന്ന് അഞ്ച് വയസ്സുകാരന് ദാരുണാന്ത്യം. മൈസൂരു ജില്ലയിലെ ഗൗരീപുര ഗ്രാമത്തിലാണ് ഹൃദയഭേദകമായ സംഭവം ഉണ്ടായത്. ഗ്രാമപഞ്ചായത്ത് മുൻ വൈസ് പ്രസിഡൻറ് ഗൗരമ്മയുടെയും ശങ്കർ നായക്കിന്റെയും ചെറുമകനും സന്തോഷ്-ഐശ്വര്യ ദമ്പതികളുടെ ഏകമകനുമായ മുകുന്ദ് മയൂർ (5) ആണ് മരിച്ചത്. ഇന്നലെയാണ് സംഭവം നടന്നത്.
പ്രാഥമിക വിവരങ്ങൾ പ്രകാരം, കുർക്കുറെ പാക്കറ്റിനൊപ്പം സൗജന്യമായി ലഭിച്ച ചെറിയ പ്ലാസ്റ്റിക് ബോൾ ഉപയോഗിച്ച് കളിക്കുന്നതിനിടെയാണ് കുട്ടി അബദ്ധത്തിൽ അത് വിഴുങ്ങിയത്. കളിപ്പാട്ടം തൊണ്ടയിൽ കുടുങ്ങിയതിനെ തുടർന്ന് കുട്ടിക്ക് ശ്വാസതടസം അനുഭവപ്പെടുകയായിരുന്നു. കുട്ടി ശ്വാസംമുട്ടുന്നതായി ശ്രദ്ധയിൽപ്പെട്ട ഉടൻ വീട്ടുകാർ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. തൊണ്ടയിൽ കുടുങ്ങിയ പ്ലാസ്റ്റിക് ബോൾ മൂലമാണ് മരണമെന്ന് പ്രാഥമിക നിഗമനം. സംഭവത്തിൽ ഹുൻസൂർ റൂറൽ പോലീസ് കേസെടുത്ത് അന്വേഷണം ആരംഭിച്ചു.
