പത്തനംതിട്ട : ഇലന്തൂരില് ഇരട്ട നരബലി നടന്ന കടകംപ്പള്ളി വീടു കാണാന് എത്തുന്നവരുടെ ഒഴുക്കു തുടരുന്നു. ആളുകള് കയറിയിറങ്ങി കാടുമൂടി കിടന്നിരുന്ന ഭഗവല്സിങ്ങിന്റെ പറമ്പ് വൃത്തിയായി. ഒരാള് പൊക്കത്തില് ഉണ്ടായിരുന്ന കാടാണു ആളുകള് ചവിട്ടി മെതിച്ചു വഴിയായി മാറിയത്. ഭയം മൂലം നേരത്തെ ആരും കടന്നു ചെല്ലാന് മടിച്ചിരുന്ന തിരുമ്മല് കേന്ദ്രത്തിനും കാവിനും സമീപമെല്ലാം വഴി തെളിഞ്ഞു.
സ്വന്തം നാട്ടില് നടന്ന ഇത്രയും ദാരുണമായ സംഭവത്തിന്റെ സ്ഥലം കാണാതിരുന്നാല് എങ്ങനെയാണെന്നാണു കാണികളുടെ ചോദ്യം. കൊല്ലം, വയനാട്, കോട്ടയം ഉള്പ്പെടെ ദൂരെ സ്ഥലങ്ങളില് നിന്നു വീട് കാണാന് ആളുകള് എത്തുന്നുണ്ട്. ചിലര്ക്ക് മൃതദേഹങ്ങള് കുഴിച്ചിട്ടിരുന്ന സ്ഥലങ്ങള് കാണാനാണു താല്പര്യം. ആളുകള് മതിലു ചാടി കടക്കുന്നതു ഒഴിവാക്കാന് വീടിന്റെ ഗേറ്റ് തുറന്നു വെച്ചിരിക്കയാണ് സമീപത്തു താമസിക്കുന്ന ജോസ് തോമസ്. ജില്ലയുടെ വിവിധ ഭാഗങ്ങളില് നിന്നുള്ളവരും നരഹത്യ നടന്ന സ്ഥലം കാണാന് എത്തുന്നുണ്ട്.
