പത്തനംതിട്ട : പത്തനംതിട്ട നഗര ഹൃദയത്തില് മാലിന്യം തള്ളുന്ന യുവാക്കളുടെ ദൃശ്യങ്ങള് സമൂഹ മാധ്യമങ്ങളില് പ്രചരിക്കുന്നു. നഗരസഭാ ബസ് സ്റ്റാന്റ് ഭാഗത്ത് സ്ഥാപിച്ചിരിക്കുന്ന മാലിന്യ ശേഖരണ കേന്ദ്രത്തിന് സമീപമായാണ് ബൈക്കില് എത്തിയ യുവാക്കള് വലിയ കവറില് കെട്ടിയ മാലിന്യം പുറത്ത് നിന്നും അകത്തേക്ക് വലിച്ചെറിയുന്നത്. കഴിഞ്ഞ രാത്രിയില് നടന്ന സംഭവത്തിന്റെ ദൃശ്യങ്ങള് ആരോ മൊബൈലില് പകര്ത്തുകയും സമൂഹ മാധ്യമങ്ങള് വഴി പ്രചരിപ്പിക്കുകയുമായിരുന്നു. പത്തനംതിട്ട നഗരത്തിലെ പലയിടത്തും സന്ധ്യ കഴിഞ്ഞാല് ഇത് തന്നെയാണ് അവസ്ഥ. നഗരത്തിലെ കാടുകയറി കിടക്കുന്ന ഭാഗങ്ങളില് പുറത്ത് നിന്നും വാഹനങ്ങളില് എത്തിക്കുന്ന മാലിന്യങ്ങള് കൊണ്ട് വന്ന് തള്ളുന്നത് പതിവായി മാറുകയാണ്.
നഗരത്തിലെ തോടുകളും ഒഴിഞ്ഞു കിടക്കുന്ന സ്ഥലങ്ങളും എല്ലാംതന്നെ മാലിന്യങ്ങളുടെ കൂമ്പാരമായി മാറുകയാണ്. പത്തനംതിട്ട നഗരസഭാ പരിധിയിലെ മാലിന്യങ്ങള് സംസ്കരിക്കുവാനും സംവിധാനമില്ല. നഗരത്തില് കുന്നുകൂടുന്ന മാലിന്യങ്ങള് നീക്കം ചെയ്യാന് കഴിയാതെ പലയിടത്തും കെട്ടികിടക്കുകയാണ്. ഹരിതകര്മ്മ സേന ശേഖരിച്ച് സൂക്ഷിച്ച മാലിന്യങ്ങള് സ്ഥലത്ത് നിന്നും നീക്കം ചെയ്യാന് പോലും അധികൃതര്ക്ക് കഴിഞ്ഞില്ല. ക്ലീന് കേരള കമ്പനി നീക്കം ചെയ്യേണ്ടിയിരുന്ന മാലിന്യം ഇപ്പോഴും നഗരത്തില് കെട്ടിക്കിടക്കുകയാണ്.
