കോന്നി : കാട്ടാനയുടെ സാന്നിധ്യം മനസിലാക്കാന് ആവോലിക്കുഴിയില് ഡ്രോണ് നിരീക്ഷണം നടത്തി വനം വകുപ്പ്. ഞള്ളൂര് ഉത്തര കുമരംപേരൂര് ഫോറസ്റ്റ് സ്റ്റേഷന് പരിധിയിലാണ് ഡ്രോണ് നിരീക്ഷണം നടത്തിയത്. ആവോലിക്കുഴി കാക്കര വന മേഖലയില് വനപാലകര് സംഘങ്ങളായി തിരിഞ്ഞ് നിരീക്ഷണം നടത്തിയെങ്കിലും കാട്ടാനകളെ കണ്ടെത്താന് കഴിഞ്ഞില്ല. കുറച്ച് ദിവസങ്ങള്ക്ക് മുന്പാണ് ആവോലിക്കുഴിയില് ജനവാസ മേഖലയില് കാട്ടാന സ്വകാര്യ വ്യക്തിയുടെ കൃഷിയിടത്തില് ഷോക്കേറ്റ് ചരിഞ്ഞത്. ഇതിന് ശേഷം വനപാലകര് പ്രദേശത്ത് രാത്രികാല പരിശോധനകള് ശക്തമാക്കിയിരുന്നു.
കഴിഞ്ഞ ദിവസം രാത്രികാല പരിശോധനകള്ക്ക് എത്തിയ വനപാലകരെ നാട്ടുകാര് തടയുകയും കാട്ടാന ശല്യത്തിന് പരിഹാരം കാണണമെന്ന് ആവശ്യപ്പെടുകയും ചെയ്തിരുന്നു. തുടര്ന്ന് കോന്നി ഡി.എഫ്.ഓ ആയുഷ് കുമാര് കോറി ഫോണിലൂടെ ഇവരെ ബന്ധപ്പെടുകയും നടപടി വേഗത്തിലാക്കാം എന്ന് ഉറപ്പ് നല്കുകയും ചെയ്തതിനെ തുടര്ന്നാണ് നാട്ടുകാര് പ്രതിഷേധം അവസാനിപ്പിച്ചത്. വരും ദിവസങ്ങളിലും പ്രദേശത്ത് തിരച്ചില് ശക്തമാക്കുമെന്നും വനപാലകര് അറിയിച്ചു.
