റാന്നി : ചെത്തോങ്കര – അത്തിക്കയം ശബരിമല പാതയോരത്തെ കരികുളം വനത്തില് വര്ഷങ്ങളായി മാലിന്യം തള്ളിയിട്ടും നിയമ നടപടികള് സ്വീകരിക്കാതെ വനം വകുപ്പ് അധികൃതര്. സംരക്ഷിത വനമേഖലയില്പ്പെടുന്ന ഇവിടെ വിവിധ വ്യാപാര സ്ഥാപനങ്ങളുടെയും വീടുകളിലെയും മാലിന്യങ്ങള് ചാക്കുകളിലാക്കിയും അല്ലാതെയും ഉപേക്ഷിക്കുന്നത് പതിവാണ്. വര്ഷങ്ങളായി തുടരുന്ന ഈ പ്രവണത വന്യ ജീവികള്ക്ക് ഭീഷണിയായി മാറിയിട്ടും മാലിന്യം തള്ളുന്നവരെ പിടികൂടുവാനോ നിയമ നടപടികള് സ്വീകരിക്കുവാനോ ബന്ധപ്പെട്ട അധികാരികള്ക്ക് കഴിയുന്നില്ല. റോഡില് നിന്നും വനത്തിലേക്ക് വലിച്ചെറിയുന്ന ഭക്ഷണാവശിഷ്ടങ്ങളും മാംസാവശിഷ്ടങ്ങളും പ്രദേശത്ത് ദുര്ഗന്ധം പരത്തുകയും രോഗഭീതി വര്ദ്ധിപ്പിക്കുകയും ചെയ്യുന്നു.
പ്ലാസ്റ്റിക് മാലിന്യങ്ങള് ഭക്ഷിക്കുന്നത് വന്യ ജീവികളുടെ ജീവനും ഭീഷണിയായി മാറുന്നുണ്ട്. റോഡില് വലിച്ചെറിയുന്ന കോഴിക്കടയിലെ മാലിന്യങ്ങള് വാഹനങ്ങള് കയറിയിറങ്ങി ചതഞ്ഞരഞ്ഞ് കിടക്കുന്നതും കാണാം. മാലിന്യം വര്ദ്ധിച്ചതോടെ തെരുവ് നായകളുടെ ശല്യവും വര്ധിച്ചു. വനത്തില് മാലിന്യം തള്ളുന്നവരെ പിടികൂടുവാന് വനം വകുപ്പ് ക്യാമറകള് സ്ഥാപിച്ചിട്ടും യാതൊരു പ്രയോജനവും ഉണ്ടായില്ല. തേക്കടി ജംഗ്ഷന് മുതല് കക്കുടുമണ് വരെ വനത്തില് മാലിന്യം തള്ളുന്നത് പതിവായി മാറുന്നുണ്ട്. വന ഭാഗത്ത് ആളനക്കമില്ലാത്തതിനാല് രാത്രി സമയങ്ങളില് ആയിരിക്കാം മാലിന്യം തള്ളുന്നത് എന്നാണ് പ്രദേശവാസികള് പറയുന്നത്. മഴകൂടി പെയ്ത് തുടങ്ങിയതോടെ മാലിന്യത്തിന്റെ രൂക്ഷ ഗന്ധം മൂലം വാഹനങ്ങളില് പോലും ഈ വഴി സഞ്ചരിക്കാന് കഴിയാത്ത സ്ഥിതിയാണ് നിലവിലുള്ളത്.
