പെരുനാട് : മുക്കട – പെരുനാട് ശബരിമല പാതയുടെ ഭാഗമായ പെരുനാട് – അത്തിക്കയം റോഡിൽ വളര്ന്നു നില്ക്കുന്ന കാടുകള് റോഡിലെ കാഴ്ച മറയ്ക്കുന്നത് വാഹന യാത്രക്കാർക്ക് വൻ അപകടഭീഷണിയാകുന്നു. പാതയിലെ പ്രധാന വളവുകളിൽ പോലും റോഡിലേക്ക് ഇറങ്ങി നിൽക്കുന്ന രീതിയിലാണ് കാട് വളർന്നിട്ടുള്ളത്. ഇതോടെ എതിരെ വരുന്ന വാഹനങ്ങൾ കൃത്യമായി കാണാൻ കഴിയാതെ ഡ്രൈവർമാർ ദുരിതത്തിലായിരിക്കുകയാണ്. നിരന്തരം ചെറുതും വലുതുമായ അപകടങ്ങൾ നടക്കുന്ന റോഡായിട്ടും അധികൃതർ ഈ ഗുരുതര സാഹചര്യം കണ്ടില്ലെന്ന് നടിക്കുകയാണെന്നാണ് നാട്ടുകാരുടെ ആക്ഷേപം. റോഡിന്റെ ഇരുവശങ്ങളിലും കാട് മൂടിയതോടെ കാൽനടയാത്രക്കാർക്ക് വശങ്ങളിലൂടെ നടക്കാൻ കഴിയാത്ത അവസ്ഥയാണ്.
ഇതോടെ ഇവർ ജീവൻ പണയപ്പെടുത്തി റോഡിന്റെ നടുവിലേക്ക് കയറി നടക്കാൻ നിർബന്ധിതരാവുകയാണ് യാത്രക്കാര്. സീസണില് ശബരിമല തീർത്ഥാടകർ ഉൾപ്പെടെ നിരവധി വാഹനങ്ങൾ കടന്നുപോകുന്ന പ്രധാന പാതയിലാണ് ഈ അവഗണന. അപകടങ്ങൾ പതിയിരിക്കുന്ന ഈ വളവുകളിലെ കാടുകൾ അടിയന്തരമായി വെട്ടിമാറ്റി റോഡിലെ കാഴ്ചമറവ് ഒഴിവാക്കണം. വലിയൊരു ദുരന്തം ഉണ്ടാകുന്നതിന് മുൻപ് പൊതുമരാമത്ത് വകുപ്പും തദ്ദേശ സ്ഥാപനങ്ങളും ഇടപെട്ട് ഇതിന് പരിഹാരം കാണണമെന്നും പ്രദേശവാസികള് ആവശ്യപ്പെടുന്നു
