വയനാട്: പുല്പ്പള്ളി കൊളവള്ളിയില് ജനവാസ കേന്ദ്രത്തിലിറങ്ങിയ കടുവയെ തുരത്തുന്നതിനിടെ ഫോറസ്റ്റ് റെയ്ഞ്ചറെ കടുവ അക്രമിച്ചു. ചെതലയം റേഞ്ച് ഓഫീസര് ടി. ശശികുമാറിന് നേരെയാണ് ആക്രമണമുണ്ടായത്. കൊളവള്ളിയില് കടുവ ഇറങ്ങിയെന്ന പ്രചാരണത്തെ തുടര്ന്ന് നാട്ടുകാരുള്പ്പെടെ വനപാലക സംഘത്തിന്റെ നേതൃത്വത്തില് തിരച്ചില് നടത്തിവരികയായിരുന്നു.
നാട്ടുകാരുടെ കൂടി സഹകരണത്തോടെ കടുവയെ തുരത്താന് ശ്രമിക്കുന്നിനിടെയാണ് പതുങ്ങിയിരുന്ന കടുവ ശശികുമാറിനു നേരെ അക്രമണം നടത്തിയത്. വൈകീട്ട് മൂന്നരയോടെയായിരുന്നു ആക്രമണം. പരിക്ക് സാരമുള്ളതല്ല. കര്ണാടക വനാതിര്ത്തിയില് കബനി നദിയോട് ചേര്ന്നുള്ള പ്രദേശമാണ് കൊളവള്ളി. കബനി നദിയുടെ മറുകരയിലുള്ള വന്യജീവി സങ്കേതത്തില് നിന്ന് പുഴ കടന്നെത്തിയ കടുവയാണ് ജനവാസ മേഖലയിലെത്തിയിട്ടുള്ളതെന്നാണ് നിഗമനം.
