കോട്ടയം: കോട്ടയം മെഡിക്കല് കോളേജിലെ ഹെല്ത്ത് ഇന്സ്പെക്ടര് എന്ന വ്യാജേന ജോലി വാഗ്ദാനം ചെയ്ത് ലക്ഷങ്ങള് തട്ടിയെടുത്ത യുവാവ് പിടിയില്. കൊല്ലം കുന്നത്തൂര് പുത്തന്പാലത്ത് കോയിക്കല് കുഴിയില് വീട്ടില് അരുണ് എം (30) എന്നയാളെയാണ് കോട്ടയം ഗാന്ധിനഗര് പോലീസ് അറസ്റ്റുചെയ്തത്. ഹെല്ത്ത് ഇന്സ്പെക്ടര് എന്ന പേരില് ഇയാള് എസ്.ടി പ്രോമോട്ടര്മാരെ കമ്പളിപ്പിക്കുകയും ജോലി വഗ്ദാനം ചെയ്ത് യുവാക്കളില് നിന്ന് പണം തട്ടിയെടുക്കുകയും ചെയ്തു.
സംക്രാന്തി സ്വദേശിയായ യുവാവില് നിന്നും ഹെല്ത്ത് ഡിപ്പാര്ട്ട്മെന്റില് ക്ലര്ക്ക് ജോലി വാങ്ങിത്തരാമെന്ന് പറഞ്ഞ് 6,70,000 രൂപ ഇയാള് തട്ടിയെടുത്തിരുന്നു. ജോലി ലഭിക്കാത്തതിനെ തുടര്ന്ന് കമ്പളിപ്പിക്കപ്പെട്ടു എന്ന മനസിലായ യുവാവ് പോലീസില് പരാതി നല്കി. കോട്ടയം എസ്.പി കെ.കാര്ത്തിക്കിന്റെ നേതൃത്വത്തില് പ്രത്യേക അന്വേഷണ സംഘം രൂപീകരിച്ചു നടത്തിയ അന്വേഷണത്തിലാണ് അരുണിനെ പിടികൂടിയത്.
