റാന്നി: വെച്ചൂച്ചിറ കുന്നം ഗവൺമെൻറ് എല്.പി സ്കൂളിൻറെ നേതൃത്വത്തില് സ്വാതന്ത്ര്യ സംരക്ഷണ റാലിയും മുന് സൈനികരെ ആദരിക്കലും നടത്തി. വിമുക്തഭടന്മാരുടെ അനുഭവങ്ങൾ പങ്കുവെച്ചത് വൈകാരിക അനുഭവമായി മാറി. മെലിറ്ററി നെഴ്സ് ആയിരുന്ന ചെല്ലമ്മയുടെ വാക്കുകൾ മിക്കവരുടെയും കണ്ണുനനയിച്ചു. ഞങ്ങൾ ഉറങ്ങാതിരുന്നത് നിങ്ങൾ സുഖമായുറങ്ങാനായിരുന്നു. ജാതിയുടെയും മതത്തിന്റെയും പേരിലുള്ള നിങ്ങളുടെ കൊലപാതകങ്ങൾ ഞങ്ങളെ വേദനിപ്പിക്കുന്നു. ഞങ്ങൾ 18-ാം വയസ് മുതൽ രാജ്യത്തിനു വേണ്ടി ജീവിതം ഉഴിഞ്ഞ് വെച്ചത് ഇതിനല്ല.
നല്ല ഒരിന്ത്യ അതായിരുന്നു ഞങ്ങളുടെ സ്വപ്നം. ഇത്തരം വാക്കുകൾ കേട്ടപ്പോൾ കുട്ടികള്ക്ക് പട്ടാളക്കാരുടെ രാജ്യസ്നേഹത്തിന്റെ ആഴം അറിയുവാന് പറ്റി. ബ്ലോക്കു പഞ്ചായത്തംഗം സതീഷ് കെ.പണിക്കര് പരിപാടി ഉദ്ഘാടനം ചെയ്തു. പി.ടി.എ പ്രസിഡന്റ് ബിനുരാജ് അധ്യക്ഷത വഹിച്ചു. മിലറ്ററി നേഴ്സായിരുന്ന ചെല്ലമ്മ മുഖ്യ പ്രഭാഷണം നടത്തി. വിമുക്തഭടന്മാരായ ഗോപാലകൃഷ്ണന്,എം.കെ എബ്രഹാം മാമൂട്ടില്,പ്രഥമധ്യാപകന് സി.പി സുനില്,കെ.കെ ബിനു,അപര്ണ്ണ,എം ബീന,ചിഞ്ചു എന്നിവര് പ്രസംഗിച്ചു.
