കൊച്ചി : മനോരമ ന്യൂസ് സീനിയര്‍ കറസ്പോണ്ടന്‍റ് എസ്.മഹേഷ്കുമാറിന് രാംനാഥ് ഗോയങ്ക പുരസ്കാരം. ‘ഓപ്പറേഷൻ നേപ്പാൾ ഗോൾഡ്’ എന്ന പരമ്പരയ്ക്കാണ് അന്വേഷണാത്മക റിപ്പോര്‍ട്ടിങ്ങിനുള്ള പുരസ്കാരം. 2019ൽ രാജ്യത്താകമാനം റിപ്പോർട്ട് ചെയ്ത അന്വേഷണാത്മക വാർത്തകളിൽ നിന്നാണ് മഹേഷിന്റെ റിപ്പോർട്ട് തെരഞ്ഞെടുത്തത്.
ഈ വിഭാഗത്തിൽ മത്സരം കടുത്തതായിരുന്നുവെന്ന് രാംനാഥ് ഗോയങ്ക മെമ്മോറിയൽ ഓഫ് ഫൗണ്ടേഷൻ ചെയർമാൻ വിവേക് ഗോയങ്ക അറിയിച്ചു. നേപ്പാൾ വഴി ഇന്ത്യയിലേക്ക് സ്വർണക്കടത്ത് സംഘങ്ങൾക്കൊപ്പം സഞ്ചരിച്ചാണ് മഹേഷ് രാജ്യാന്തര ശൃംഖലയുടെ വിവരങ്ങൾ പുറത്തുകൊണ്ടുവന്നത്. ഒരുലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്കാരം. മാർച്ചിൽ സമ്മാനിക്കും.
