തൊടുപുഴ : അന്തരിച്ച കെ.പി.സി.സി വര്ക്കിങ് പ്രസിഡന്റ് പി.ടി. തോമസിന്റെ ചിതാഭസ്മം ജനുവരി മൂന്നിന് ജന്മനാടായ ഉപ്പുതോട്ടിലേക്ക് കൊണ്ടുവരും. മൃതദേഹം രവിപുരം ശ്മശാനത്തില് ദഹിപ്പിച്ചശേഷം ചിതാഭസ്മത്തില് ഒരു ഭാഗം ഉപ്പുതോട്ടില് മാതാവിന്റെ കല്ലറയില് സംസ്കരിക്കണമെന്ന പി.ടി. തോമസിന്റെ അന്ത്യാഭിലാഷപ്രകാരമാണിത്. കല്ലറ തുറന്ന് ചിതാഭസ്മം സംസ്കരിക്കാന് ഇടുക്കി ബിഷപ് അനുമതി നല്കി.
തിങ്കളാഴ്ച രാവിലെ ഏഴിന് പി.ടി. തോമസിന്റെ എറണാകുളം പാലാരിവട്ടത്തെ വീട്ടില്നിന്ന് പ്രത്യേക വാഹനത്തില് ചിതാഭസ്മ പ്രയാണം ആരംഭിക്കും. കുടുംബാംഗങ്ങള് അനുഗമിക്കും. 11ന് നേര്യമംഗലത്ത് ഡി.സി.സി അധ്യക്ഷന് സി.പി. മാത്യുവിന്റെ നേതൃത്വത്തില് ചിതാഭസ്മം ഏറ്റുവാങ്ങും. ആദരവ് അര്പ്പിക്കാന് നേര്യമംഗലം, ഇരുമ്പുപാലം, അടിമാലി, കല്ലാര്കുട്ടി, പാറത്തോട്, മുരിക്കാശ്ശേരി എന്നിവിടങ്ങളില് പ്രവര്ത്തകര്ക്ക് അവസരമുണ്ടാകും.
വൈകീട്ട് നാലിന് പ്രയാണം ഉപ്പുതോട്ടിലെത്തും. മാതാവിന്റെ കല്ലറയില് ചിതാഭസ്മം സംസ്കരിച്ച ശേഷം ഉപ്പുതോട് ജങ്ഷനില് നടക്കുന്ന അനുസ്മരണ സമ്മേളനത്തില് സി.പി. മാത്യു അധ്യക്ഷത വഹിക്കും. കെ.പി.സി.സി അധ്യക്ഷന് കെ. സുധാകരന്, മുന് മുഖ്യമന്ത്രി ഉമ്മന് ചാണ്ടി, എ.ഐ.സി.സി സെക്രട്ടറി ഐവാന് ഡിസൂസ തുടങ്ങിയവര് സംസാരിക്കും.