ന്യൂഡല്ഹി : ഗ്യാന്വാപി കേസില് മസ്ജിദ് കമ്മിറ്റിക്ക് വേണ്ടി ഹാജരാകുന്ന മുതിര്ന്ന അഭിഭാഷകന് അഭയ്നാഥ് യാദവ് അന്തരിച്ചു. ഹൃദയാഘാതം മൂലമാണ് മരണം. ഞായറാഴ്ച രാത്രി 10.30 നാണ് അദ്ദേഹത്തില് ഹൃദയാഘാതമുണ്ടായതെന്ന് ബനാറസ് ബാര് അസോസിയേഷനിലെ അഭിഭാഷകന് നിത്യാനന്ദ് റായ് പറഞ്ഞു. ഉടന് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
ഗ്യാന്വാപി കേസില് മസ്ജിദ് കമ്മിറ്റിയുടെ സുപ്രധാന അഫിഡവിറ്റ് ആഗസ്ത് നാലിന് കോടതിയില് സമര്പ്പിക്കാനിരിക്കെയാണ് അഭയ്നാഥ് യാദവിന്റെ അപ്രതീക്ഷിത വിയോഗം. ഗ്യാന്വാപി കേസില് ഇനി ഒക്ടോബറിലാണ് സുപ്രിംകോടതി വാദം കേള്ക്കുക. വിഷയം ഇപ്പോള് കീഴ്ക്കോടതി പരിഗണനയിലാണെന്ന് ചൂണ്ടിക്കാട്ടിയാണ് സുപ്രിംകോടതി വാദം കേള്ക്കുന്നത് നീട്ടിയത്. ജസ്റ്റിസുമാരായ ഡി.വൈ ചന്ദ്രചൂഡ്, സൂര്യകാന്ത്, നരസിംഹ എന്നിവരടങ്ങിയെ ബെഞ്ചാണ് കേസ് പരിഗണിക്കുന്നത്.
