ന്യൂഡല്ഹി : ഡല്ഹി സര്ക്കാരിന്റെ റേഷന് വിതരണ പദ്ധതിയായ “ഘര് ഘര് റേഷന് യോജന”ക്കെതിരെ കേന്ദ്ര സര്ക്കാര് ഹൈക്കോടതിയില്. ദേശീയ ഭക്ഷ്യസുരക്ഷാ നിയമം (എന്എഫ്എസ്എ) നടപ്പാക്കുമ്പോള് അതിന്റെ ഘടന ലഘൂകരിക്കാന് സംസ്ഥാനത്തിന് കഴിയില്ലെന്ന് കേന്ദ്രം കോടതിയെ അറിയിച്ചു. ന്യായവില കടകള് എന്എഫ്എസ്എയുടെ അവിഭാജ്യ ഘടകമാണെന്നും സംസ്ഥാനം നിയമത്തിന്റെ ഘടനയ്ക്ക് വഴങ്ങേണ്ടിവരുമെന്നും കേന്ദ്രം പറഞ്ഞു. മണിക്കൂറുകളോളം വാദം കേട്ട കോടതി നവംബര് 29 ന് വാദം കേള്ക്കുന്നത് തുടരുമെന്ന് അറിയിച്ചു.
ഡല്ഹി സര്ക്കാരിന്റെ മുഖ്മന്ത്രി ഘര് ഘര് റേഷന് യോജന വഴി വീട്ടുപടിക്കല് റേഷന് വിതരണം ചെയ്യുന്ന പദ്ധതിയെ ചോദ്യം ചെയ്ത് റേഷന് ഡീലേഴ്സ് സംഘിന്റെ ഹര്ജി പരിഗണിക്കുകയായിരുന്നു കോടതി. ജസ്റ്റിസുമാരായ വിപിന് സംഘി, ജസ്മീത് സിംഗ് എന്നിവരടങ്ങിയ ബെഞ്ചാണ് കേസ് പരിഗണിക്കുന്നത്.