ന്യൂഡല്ഹി : രാജ്യത്ത് പാചക വാതക സിലിണ്ടറുകളുടെ വില വീണ്ടും വര്ധിപ്പിച്ചു. ഈ മാസം രണ്ടാം തവണയാണ് വില വര്ധിപ്പിക്കുന്നത്. ഗാര്ഹിക, വാണിജ്യ സിലിണ്ടറുകളുടെ വില വര്ധിപ്പിച്ചിട്ടുണ്ട്. ഗാര്ഹിക സിലിണ്ടറുകളുടെ വില 3.50 രൂപയാണ് വര്ധിപ്പിച്ചത്. ഇതോടെ രാജ്യത്തെല്ലായിടത്തും ഗാര്ഹിക എല് പി ജി സിലിണ്ടറിന്റെ വില ആയിരം രൂപ കടന്നു. 14.2 കിലോ വരുന്ന സിലിണ്ടറിന് കേരളത്തില് 1,010 രൂപ നല്കണം. മുംബൈയില് ഇതിന് 1,002.50 രൂപയും കൊല്ക്കത്തയില് 1,029 രൂപയും ചെന്നൈയില് 1,058.50 രൂപയും ഡല്ഹിയില് 1,003 രൂപയുമാണ്. ഈ മാസം ഏഴിന് ഗാര്ഹിക എല് പി ജി സിലിണ്ടറിന് 50 രൂപ വര്ധിപ്പിച്ചിരുന്നു.
വാണിജ്യ സിലിണ്ടറിന് എട്ട് രൂപയാണ് വര്ധിപ്പിച്ചത്. 19 കിലോ വരുന്ന വാണിജ്യ സിലിണ്ടറിന് ഡല്ഹിയില് 2,354 രൂപയും കൊല്ക്കത്തയില് 2,454 രൂപയും മുംബൈയില് 2,306 രൂപയും ചെന്നൈയില് 2,507 രൂപയുമാണ്. ഇതോടെ ഹോട്ടല് ഭക്ഷണത്തിന് അടക്കമുള്ളവക്ക് വില വര്ധിക്കും.