ഡല്ഹി: ഡല്ഹിയില് വിവാഹാഭ്യര്ഥന നിരസിച്ചതിന് പ്രായപൂര്ത്തിയാകാത്ത പെണ്കുട്ടിയെ കത്തി കൊണ്ട് കുത്തിപ്പരിക്കേല്പ്പിച്ചു. കഴുത്തിനും തലയ്ക്കും ഗുരുതരമായി പരിക്കേറ്റ പെണ്കുട്ടി ആശുപത്രിയില് ചികിത്സയിലാണ്. തെക്കുകിഴക്കന് ഡല്ഹിയിലെ ബദര്പൂര് ഏരിയയിലാണ് സംഭവം നടന്നത്. സംഭവത്തിന് ശേഷം പ്രതി ഒളിവില് പോയിരുന്നു. തുടര്ന്ന് നടത്തിയ അന്വേഷണത്തില് സിസിടിവി ദൃശ്യങ്ങളുടെ സഹായത്തോടെയാണ് പ്രതിയെ പോലീസ് പിടികൂടിയത്.
പെണ്കുട്ടിയും ഇയാളും തമ്മില് കഴിഞ്ഞ നാല് വര്ഷമായി പ്രണയത്തിലായിരുന്നു. അടുത്തിടെ പെണ്കുട്ടി ബന്ധം അവസാനിപ്പിക്കുകയും വിവാഹാഭ്യര്ഥന നിരസിക്കുകയും ചെയ്തിരുന്നു. ഇതാണ് പ്രകോപനത്തിന് കാരണമെന്ന് പോലീസ് പറയുന്നു. പെണ്കുട്ടിയുടെ സുഹൃത്തിന്റെ വീട്ടില് വച്ചായിരുന്നു ആക്രമണം. കഴുത്തിനും തലയ്ക്കും കുത്തേറ്റ പെണ്കുട്ടി എയിംസ് ആശുപത്രിയിലാണ് ചികിത്സയില് കഴിയുന്നത്.
