കൊച്ചി : നെടുമ്പാശേരി വിമാനത്താവളത്തില് വീണ്ടും വന് സ്വര്ണ വേട്ട. അഞ്ച് യാത്രക്കാരില് നിന്നായി നാലേകാല് കിലോ സ്വര്ണം കസ്റ്റംസ് പിടിച്ചെടുത്തു. പിടിയിലായവരില് രണ്ട് ദമ്പതിമാരും ഒരു മലേഷ്യന് പൗരയായ ഇന്ത്യന് വംശജയും ഉള്പ്പെടുന്നു. ദുബൈയില് നിന്നുള്ള എയര് ഇന്ത്യ വിമാനത്തില് എത്തിയ തൃശ്ശൂര് സ്വദേശി ഷാഹുല് ഹമീദ്, ഭാര്യ ഷബ്ന ഷാഹുല്, ക്വാലാലംപൂരില് നിന്നുള്ള എയര് ഏഷ്യ വിമാനത്തില് എത്തിയ തീര്ത്ഥ മലൈ തിരുപ്പിറന്തഗം, ഭാര്യ വെണ്ണില ചിന്നത്തമ്പി, ഈ ദമ്പതികളുടെ സുഹൃത്തും മലേഷ്യന് പൗരയുമായ സരസ്വതി കൃഷ്ണസാമി എന്നിവരാണ് സ്വര്ണം കടത്താനുള്ള ശ്രമത്തിനിടെ പിടിയിലായത്. അഞ്ച് പേരില് നിന്നുമായി പിടിച്ചെടുത്ത സ്വര്ണ്ണത്തിന് ഒരു കോടി തൊണ്ണൂറ് ലക്ഷം രൂപ മൂല്യം വരുമെന്ന് കസ്റ്റംസ് അധികൃതര് അറിയിച്ചു.
