മുംബൈ: വ്യാജ വായ്പാ ആപ്പുകളെ ഇന്ത്യയിലെ പ്ലേ സ്റ്റോറില് നിന്ന് നീക്കം ചെയ്ത് ഗൂഗിള്. കഴിഞ്ഞ വര്ഷം 3500ലധികം വായ്പ ആപ്പുകള്ക്കെതിരെ നിയമ നടപടി സ്വീകരിച്ചതായി ഗൂഗിള് അറിയിച്ചു. പോളിസി നിമങ്ങള് ലംഘിച്ചതിനാണ് നടപടി. പ്ലേ സ്റ്റോറില് നിന്ന് നീക്കം ചെയ്യുന്നതുള്പ്പെടെയുള്ള നടപടികളാണ് ഇത്തരം ആപ്പുകള്ക്കെതിരെ ഗൂഗിള് സ്വീകരിച്ചത്. 2022 ജനുവരി മുതല് 2022 ജൂലൈ വരെ ഇന്ത്യയിലെ ആപ്പ് മാര്ക്കറ്റില് നിന്ന് 2,000 വായ്പാ ആപ്പുകളെ ഒഴിവാക്കിയതായി 2022 ഓഗസ്റ്റില് ഗൂഗിള് അറിയിച്ചിരുന്നു.
രജിസ്റ്റര് ചെയ്യാത്തതും തട്ടിപ്പുകള് നടത്തുന്നതുമായ ഇത്തരം ആപ്പുകളുടെ എണ്ണം വര്ദ്ധിച്ചു വരുന്നത് സര്ക്കാരിനെയും റിസര്വ് ബാങ്ക് ഓഫ് ഇന്ത്യയെയും (ആര്ബിഐ) എന്ഫോഴ്സ്മെന്റ് ഡയറക്ടറേറ്റിനെയുമൊക്കെ (ഇഡി) ആശങ്കയിലാക്കിയിട്ടുണ്ട്. ഉപഭോക്താക്കള്ക്ക് ഉയര്ന്ന പലിശ നിരക്കിലാണ് ഇവര് വായ്പ നല്കുന്നത്. ഈ ആപ്പുകള് മൂലം പലരും ആത്മഹത്യ ചെയ്യുന്ന സാഹചര്യം വരെ ഉണ്ടായിട്ടുണ്ട്.
