പത്തനംതിട്ട: സെൻസസ് ഡ്യൂട്ടിയുടെ മറവിൽ സർക്കാർ നടത്തുന്ന അധ്യാപക ദ്രോഹ നടപടികൾ അവസാനിപ്പിക്കണമെന്ന് ഓൾ കേരള സ്കൂൾ ടീച്ചേഴ്സ് യൂണിയൻ (എ.കെ.എസ്.ടി.യു) ജില്ലാ സെക്രട്ടറിയേറ്റ് യോഗം ആവശ്യപ്പെട്ടു. ഒരു സ്കൂളിൽ നിന്ന് പകുതിയിൽ അധികം അധ്യാപകർ സെൻസസ് ഡ്യൂട്ടിയിൽ പങ്കെടുക്കുന്നതിനാൽ അധ്യയനവർഷം ആരംഭിച്ച് ഒരു മാസം പിന്നിട്ടിട്ടും സ്കൂളുകളിൽ അധ്യയനം മുടങ്ങുന്ന സാഹചര്യമാണ് നിലവിലുള്ളത്. സെൻസസ് ഡ്യൂട്ടിയിൽ പങ്കെടുക്കുന്ന അധ്യാപകർക്ക് പകരം ദിവസവേതന അടിസ്ഥാനത്തിൽ അധ്യാപകരെ നിയമിക്കണമെന്നും സെൻസസ് ഡ്യൂട്ടിയിൽ പങ്കെടുക്കുന്ന മുഴുവൻ ദിവസങ്ങളിലും അധ്യാപകർക്ക് ഡ്യൂട്ടി ലീവ് അനുവദിക്കണമെന്നും സെൻസസിന്റെ പേരിൽ നിർത്തിവെച്ചിരിക്കുന്ന അധ്യാപക സ്ഥലംമാറ്റ നടപടികൾ അടിയന്തിരമായി പൂർത്തീകരിക്കണമെന്നും കമ്മിറ്റി ആവശ്യപ്പെട്ടു.
പൊതു വിദ്യാലയങ്ങളുടെ പ്രവർത്തനങ്ങൾക്ക് തുരങ്കം വെയ്ക്കുന്ന സർക്കാരിന്റെ ഇത്തരം നടപടികൾക്കെതിരെ പ്രതിഷേധ സദസുകള് സംഘടിപ്പിക്കുന്നതിനും കമ്മിറ്റി തീരുമാനിച്ചു. ജില്ലാ പ്രസിഡന്റ് എസ്. ഷൈൻലാൽ അധ്യക്ഷത വഹിച്ചു. സംസ്ഥാന കമ്മിറ്റി അംഗം കെ.എ തൻസീർ, ജില്ലാ സെക്രട്ടറി റെജി മലയാലപ്പുഴ, സംസ്ഥാന കൗൺസിൽ അംഗം അരുൺ മോഹൻ, പി.ടി മാത്യു, തോമസ് എം. ഡേവിഡ്, എസ്. ശ്രീദേവി എന്നിവർ പ്രസംഗിച്ചു.
