തിരുവനന്തപുരം : നയപ്രഖ്യാപന പ്രസംഗത്തിന്റെ തുടക്കത്തില് പ്രതിപക്ഷ നേതാവ് വി.ഡി സതീശന് നേരെ ക്ഷുഭിതനായി ഗവര്ണര് ആരിഫ് മുഹമ്മദ് ഖാന്. നയപ്രഖ്യാപനത്തിന് നിയമസഭയിലെത്തിയ ഗവര്ണര്ക്കുനേരെ ഗോ ബാക്ക് വിളിയുമായി പ്രതിപക്ഷം എത്തിയിരുന്നു. ഇതിനാണ് ഗവര്ണറുടെ ശകാരം. സഭാ സമ്മേളനത്തില് നിങ്ങള്ക്ക് ഇതെല്ലാം ഉന്നയിക്കാനുള്ള സമയമുണ്ടെന്നും ഇപ്പോഴീ പ്രതിഷേധിക്കുന്നത് അനവസരത്തിലാണെന്നും, പ്രതിപക്ഷനേതാവ് അല്പം ഉത്തരവാദിത്തം കാണിക്കണമെന്നും പ്രതിഷേധത്തിനിടെ ഗവര്ണര് രോഷാകുലനായി. എന്നാല് പ്രതിഷേധം തുടര്ന്ന പ്രതിപക്ഷം സഭ വിട്ടിറങ്ങി സഭാ കവാടത്തില് പ്രതിഷേധം തുടര്ന്നു.
ഗവര്ണറും സര്ക്കാറും ചേര്ന്ന് നിയമസഭയെ അവഹേളിക്കുകയാണെന്ന് പ്രതിപക്ഷ നേതാവ് ആരോപിച്ചു. സര്ക്കാര് ചെയ്യുന്ന എല്ലാ നിയമവിരുദ്ധ പ്രവര്ത്തനങ്ങള്ക്കും ഗവര്ണര് കൂട്ടുനില്ക്കുകയാണ്. കണ്ണൂര് സര്വകലാശാലയില് വി.സി പുനര്നിയമനം കൊടുക്കാനുള്ള നീക്കത്തിന് ഗവര്ണര് കൂട്ടുനിന്നു. നിയമവിരുദ്ധമായ ലോകായുക്ത ഓര്ഡിനന്സില് ഒപ്പുവെച്ചു. നിയമസഭ കൂടുന്ന തീരുമാനം ഗവര്ണറും സര്ക്കാറും ചേര്ന്ന് വൈകിപ്പിച്ചുവെന്നും അദ്ദേഹം ആരോപിച്ചു.
