പത്തനംതിട്ട : ആറന്മുള ശൈലിയിലുള്ള തുഴച്ചിൽ മികവുമായി എ ബാച്ചിൽ മികച്ച ഹീറ്റ്സായി തിരഞ്ഞെടുക്കപ്പെട്ടത് മഴുക്കീർ, മേലുകര, മുണ്ടൻകാവ്, നെല്ലിക്കൽ എന്നീ പള്ളിയോടങ്ങൾ തുഴഞ്ഞ ബാച്ചാണ്. വേഷവിധാനം വഞ്ചിപ്പാട്ട് തുഴച്ചിൽ ശൈലി എന്നിവ മാനദണ്ഡമാക്കിയാണ് വിജയികളെ തിരഞ്ഞെടുത്തത്. ബി ബാച്ചിൽ ഇടക്കുളം, തൈമറവുംകര മംഗലം, പൂവത്തൂർകിഴക്ക് എന്നീ പള്ളിയോടങ്ങൾ ട്രോഫി നേടി. എ ബാച്ചിൽ ജല ഘോഷയാത്രയിലെ മികച്ച പള്ളിയോടമായി ഇടയാറന്മുളയും ബി ബാച്ചിൽ വന്മഴിയും തിരഞ്ഞെടുക്കപ്പെട്ടു.
ആറന്മുള ശൈലിയിലുള്ള തുഴച്ചിൽ വെള്ളമുണ്ടും തലയിൽക്കെട്ടും പള്ളിയോടത്തിന്റെ ചമയം എന്നിവ മാനദണ്ഡമാക്കിയാണ് മികച്ച പള്ളിയോടത്തെയും പള്ളിയോടങ്ങളുടെ ഹീറ്റ്സിനെയും തിരഞ്ഞെടുത്തത്. എ ബാച്ചിൽ മഴുക്കീർ ഉത്രാടം തിരുനാൾ മാർത്താണ്ഡ വർമ്മ ട്രോഫിയും, മേലുകര മാതൃഭൂമി ട്രോഫിയും മുണ്ടൻകാവ് ചങ്ങംകരി തങ്കപ്പനാചാരി ട്രോഫിയും നെല്ലിക്കൽ ചെമ്പകശ്ശേരി കുടുംബ ട്രോഫിയും നേടി. ബി ബാച്ചിൽ ഉത്രാടം തിരുനാൾ മാർത്താണ്ഡ വർമ്മ ട്രോഫി ഇടക്കുളവും കീഴ്ചേരിമേൽ രാജീവ്-വിശാൽ ട്രോഫി തൈമറവുംകരയും തോഷിബ ആനന്ദ് ട്രോഫി മംഗലവും വേലായുധൻ പിള്ള ട്രോഫി പൂവത്തൂർ കിഴക്കും നേടി.
