ഗുരുഗ്രാം: പിച്ച് റോളർ ശരീരത്തിലൂടെ കയറിയിറങ്ങി ക്രിക്കറ്റ് പരിശീലനകേന്ദ്രത്തിൽ കളിച്ചുകൊണ്ടിരുന്ന എട്ടുവയസ്സുകാരന് ദാരുണാന്ത്യം. ബിഹാർ സ്വദേശിയായ ആകാശ് കുമാർ ആണ് മരിച്ചത്. ഗുരുഗ്രാമിലെ ഐഎംടി നാനസറിലുള്ള ക്രിക്കറ്റ് പരിശീലനകേന്ദ്രത്തിലാണ് സംഭവം. ആകാശ് ഉൾപ്പെടെ നാല് കുട്ടികൾ പരിശീലനകേന്ദ്രത്തിൽ കളിച്ചുകൊണ്ടിരിക്കുകയായിരുന്നു. ആകാശിന്റെ മൂത്ത സഹോദരൻ നീലും മറ്റ് രണ്ട് കുട്ടികളുമാണ് ഒപ്പമുണ്ടായിരുന്നത്. ഇതിനിടെ കുട്ടികൾ പിച്ച് റോളറിന്റെ മുകളിൽ കയറി കളിക്കുകയായിരുന്നു. കളിക്കുന്നതിനിടെ അബദ്ധത്തിൽ റോളറിന്റെ സ്വിച്ച് ഓൺ ചെയ്തതായാണ് പോലീസിന് ലഭിച്ച വിവരം.
സ്വിച്ച് ഓണായതോടെ ഏകദേശം 750 കിലോ ഭാരമുള്ള പിച്ച് റോളർ മുന്നോട്ട് നീങ്ങി. ഇതിനിടെ ആകാശ് റോളറിന് മുന്നിലേക്ക് വീഴുകയും യന്ത്രം ശരീരത്തിലൂടെ കയറിയിറങ്ങുകയുമായിരുന്നു. ഗുരുതരമായി പരിക്കേറ്റ കുട്ടിയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അപകടത്തിന് പിന്നാലെ ഒപ്പമുണ്ടായിരുന്ന മറ്റ് മൂന്ന് കുട്ടികളും സ്ഥലത്തുനിന്ന് ഓടിപ്പോയി. തുടർന്ന് നീൽ ബന്ധുക്കളെ വിവരമറിയിക്കുകയായിരുന്നു. ഇതിനിടെ ക്രിക്കറ്റ് അക്കാദമിയിലെത്തിയ മറ്റ് ചിലർ റോളർ കയറിയിറങ്ങിയ നിലയിൽ ആകാശിനെ കണ്ടെത്തി. ഉടൻ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. കുട്ടികൾക്ക് അപകടസാധ്യതയുള്ള യന്ത്രങ്ങളിലേക്കും ഉപകരണങ്ങളിലേക്കും പ്രവേശനം ലഭിച്ചത് എങ്ങനെയെന്നും പോലീസ് അന്വേഷിക്കുന്നുണ്ട്.
