പത്തനംതിട്ട: ശബരിമലയിലെ പൊന്നമ്പലമേട്ടിൽ വെച്ച് പൂജ നടത്തിയതിന് തമിഴ്നാട് സ്വദേശിക്കെതിരെ കേസ്. കേരള വനം വകുപ്പാണ് കേസെടുത്തിരുക്കുന്നത്. തമിഴ്നാട് സ്വദേശി നാരായണനെതിരെയാണ് കേസ്. അനധികൃതമായി വനത്തിൽ കയറിയതിനാണ് പച്ചക്കാനം ഫോറെസ്റ്റ് സ്റ്റേഷൻ കേസെടുത്തിരിക്കുന്നത്. ഒരാഴ്ച മുൻപാണ് നാരായണൻ പൊന്നമ്പലമേട്ടിൽ എത്തി പൂജ നടത്തിയത്. മുൻപ് ശബരിമലയിൽ മുമ്പ് കീഴ്ശാന്തിയുടെ സഹായിയായിരുന്നു നാരായണൻ എന്നാണ് പുറത്തുവരുന്ന വിവരം.
അതേസമയം സംഭവത്തിൽ ദേവസ്വം മന്ത്രി കെ.രാധാകൃഷ്ണൻ അടിയന്തിര റിപ്പോർട്ട് തേടി. തിരുവിതാംകൂർ ദേവസ്വം ബോർഡ് കമ്മീഷണറോട് സംഭവത്തെക്കുറിച്ച് വിശദമായി അന്വേഷിച്ച് റിപ്പോർട്ട് സമർപ്പിക്കാൻ മന്ത്രി ആവശ്യപ്പെട്ടു. സംഭവം വിശദമായ അന്വേഷിക്കണമെന്ന് ആവശ്യപ്പെട്ട് വനം വകുപ്പ് മേധാവിക്കും പോലീസ് മേധാവിക്കും പരാതി നൽകുമെന്ന് ദേവസ്വം ബോർഡും വ്യക്തമാക്കി.
