തിരുവനന്തപുരം: കടുത്ത ചൂടിനെ തുടര്ന്ന് ഉഷ്ണതരംഗ മുന്നറിയിപ്പ് നല്കിയ പശ്ചാത്തലത്തില് സംസ്ഥാനത്തെ അങ്കണവാടികള്ക്ക് ഒരാഴ്ച അവധി. വനിതാ-ശിശു വികസന വകുപ്പാണ് അവധി പ്രഖ്യാപിച്ചത്. ഈ ദിവസങ്ങളില് കുട്ടികള്ക്ക് നല്കേണ്ട പോഷകാഹാരം വീട്ടിലെത്തി നല്കണമെന്നും വനിതാ- ശിശു വികസന വകുപ്പിന്റെ നിര്ദേശത്തില് പറയുന്നു.
—
ഉഷ്ണതരംഗ മുന്നറിയിപ്പ്
—
കൊല്ലം, തൃശൂര്, പാലക്കാട് ജില്ലകളില് കേന്ദ്ര കാലാവസ്ഥ വകുപ്പ് ഉഷ്ണതരംഗ മുന്നറിയിപ്പ് പ്രഖ്യാപിച്ചു. ഞായര്, തിങ്കള് ദിവസങ്ങളില് കൊല്ലം, തൃശൂര്, പാലക്കാട് ജില്ലകളിലെ വിവിധ പ്രദേശങ്ങളില് ഉഷ്ണതരംഗ സാഹചര്യം നിലനില്ക്കുമെന്നതിനാല് ജാഗ്രത പാലിക്കണമെന്നും മുന്നറിയിപ്പില് പറയുന്നു.
തുടര്ച്ചയായ ദിവസങ്ങളില് അതിതീവ്രമായ ചൂട് രേഖപ്പെടുത്തിയതിന്റേയും അടുത്ത ദിവസങ്ങളിലും പാലക്കാട് ജില്ലയില് 41 ഡിഗ്രി സെല്ഷ്യസ് വരെയും കൊല്ലം, തൃശൂര് ജില്ലകളില് 40 ഡിഗ്രി സെല്ഷ്യസ് വരെയും താപനില ഉയരുമെന്ന പ്രവചനത്തിന്റെയും അടിസ്ഥാനത്തിലാണ് ഉഷ്ണതരംഗ മുന്നറിയിപ്പ്. ഉഷ്ണതരംഗം അതീവ ജാഗ്രത വേണ്ട സാഹചര്യമാണ്. പൊതുജനങ്ങളും ഭരണ – ഭരണേതര സംവിധാനങ്ങളും വേണ്ട ജാഗ്രത പാലിക്കണം. സൂര്യാഘാതവും സൂര്യാതപവും ഏല്ക്കാന് സാധ്യത കൂടുതലാണ്. സൂര്യാഘാതം മരണത്തിലേക്ക് വരെ നയിച്ചേക്കാമെന്നും മുന്നറിയിപ്പില് പറയുന്നു.
