ബംഗളുരു: കര്ണാടകയില് കൊവിഡ് മാനദണ്ഡങ്ങള് ലംഘിച്ച് കുതിരയുടെ ശവസംസ്കാര ചടങ്ങില് തടിച്ചുകൂടിയത് നൂറിലേറെ പേര്. ബെലഗവി ജില്ലയിലെ മരഡിമഥ് ഗ്രാമത്തിലാണ് സംഭവം. സംഭവത്തെ തുടര്ന്ന് ജില്ലാഭരണാധികാരികള് ഗ്രാമം അടച്ചു.
ചടങ്ങിന്റെ സംഘാടകരായ 15 പേര്ക്കെതിരെ കേസെടുത്തതായും അധികൃതര് അറിയിച്ചു. ഗ്രാമവാസികള് ദൈവതുല്യം ആരാധിച്ചിരുന്ന കുതിരയാണ് കഴിഞ്ഞ ദിവസം ചത്തത്. കുതിരയുടെ ശവശരീരവുമായി നടത്തിയ ഘോഷയാത്രയില്മാത്രം നാനൂറ് പേര് പങ്കെടുത്തു. എന്നാല് ഈ ചടങ്ങുകളൊന്നും ആരോഗ്യവകുപ്പ് അധികൃതരെ അറിയിച്ചിരുന്നില്ല. സംസ്കാരചടങ്ങുകളുടെ ഫോട്ടോകളും ദൃശ്യങ്ങളും സോഷ്യല് മീഡിയയില് പ്രചരിച്ചിരുന്നു. സംഭവം ശ്രദ്ധയില് പെട്ടതോടെ ജില്ലാഭരണകൂടം നടപടിയെടുക്കുകയായിരുന്നു. നാട്ടുകാരില് നിരവധി പേര്ക്ക് കൊവിഡും സ്ഥിരീകരിച്ചതോടെ ഗ്രാമം പൂര്ണമായും അടച്ചുപൂട്ടി. ഗ്രാമത്തിലെ എല്ലാവരേയും ഉടന് പരിശോധനയ്ക്ക് വിധേയരാക്കുമെന്നും അധികൃതര് അറിയിച്ചു.
