കൊച്ചി : ജീവിതത്തില് എപ്പോഴും സന്തോഷമായിട്ടിരിക്കാനാണ് നമ്മള് എപ്പോഴും ആഗ്രഹിക്കാറുള്ളത്. എന്നാല് ഈ തിരക്കുള്ള ജീവിതത്തില് പലരും സന്തോഷം കണ്ടെത്താറില്ല എന്നുള്ളതാണ് സത്യം. ഇതിനായി നമ്മുടെ ശരീരത്തിന് വേണ്ട ഹാപ്പി ഹോർമോണുകള് നമുക്ക് ഉണ്ടാക്കിയെടുക്കാവുന്നതാണ്. ശരീരത്തിന്റെ മൊത്തത്തിലുള്ള ആരോഗ്യകരമായ പ്രവർത്തനത്തിന് ഓരോ ഹോർമോണുകളും അതിന്റേതായ പങ്കുവഹിക്കുന്നുണ്ട്.
നമ്മുടെ മാനസികാവസ്ഥയും വികാരങ്ങളുമെല്ലാം ഈ ഹോർമോണുകളെ വലിയ രീതിയിൽ ആശ്രയിച്ചിരിക്കുന്നു. തലച്ചോറിൽ നിന്നും പുറപ്പെടുവിക്കപ്പെടുന്ന ഈ ഹോർമോണുകൾക്ക് മാനസികാവസ്ഥയെ നിയന്ത്രിക്കുന്നതിനും നമ്മളെ സന്തുഷ്ടരാക്കി മാറ്റുവാനും സാധിക്കും. ഒരാളുടെ മനസ്സിനെ സ്വാധീനിക്കാൻ കഴിയുന്നതും സന്തോഷം പകരുന്നതുമായ നാല് ഹോർമോണുകൾ ഏതൊക്കെയാണ് എന്ന് നോക്കാം:
1. ഡോപാമൈൻ :
നമ്മുടെ ശരീരത്തിലെ എല്ലാ ആനന്ദകരമായ സംവേദനങ്ങളുമായി ബന്ധപ്പെട്ടിരിക്കുന്നു ഡോപാമൈൻ ഹോർമോണുകൾ. ഓർമ്മശക്തി, പഠന ശേഷി, മറ്റ് ശാരീരിക പ്രവർത്തനങ്ങൾ തുടങ്ങിയവ എല്ലാം തന്നെ സന്തോഷകരമാക്കി മാറ്റാൻ ഡോപാമൈൻ സഹായിക്കും. ഇത് ‘ഫീൽ-ഗുഡ്’ ഹോർമോൺ എന്നാണ് അറിയപ്പെടുന്നത്. നമ്മുടെ രക്തപ്രവാഹത്തിലേക്ക് ഡോപാമൈൻ ഹോമോണുകൾ റിലീസ് ചെയ്യുന്നത് വഴി തൽക്ഷണം തന്നെ നമ്മുടെ മാനസികാവസ്ഥ ഉയർന്ന നിലയിലേക്ക് എത്തപ്പെടുകയും കൂടുതൽ സന്തോഷം നൽകുകയും ചെയ്യുന്നു.
2. സെറോട്ടോണിൻ :
മറ്റൊരു ഹാപ്പി ഹോർമോണായ സെറോട്ടോണിൻ നമ്മുടെ മാനസികാവസ്ഥയെ നിയന്ത്രണ വിധേയമാക്കാൻ വേണ്ടി മാത്രമല്ല. പെട്ടെന്ന് ഉറക്കം നൽകാനും ദഹനശേഷി വർദ്ധിപ്പിക്കാനും നല്ല വിശപ്പ് നിലനിർത്താനുമെല്ലാം സഹായിക്കുന്നു. ഒരാളുടെ ശരീരത്തിൽ സെറോട്ടോണിൻ്റെ കുറവുണ്ടാകുന്നത് മൂലം വിഷാദരോഗം ഉണ്ടാകാനിടയുണ്ട് എന്ന് വൈദ്യശാസ്ത്രം വ്യക്തമാക്കുന്നു. സെറോടോണിൻ മസ്തിഷ്കത്തിലും കുടലിലുമായാണ് ഉത്പാദിപ്പിക്കപ്പെടുന്നത്. മികച്ച ഉറക്കം നൽകുന്നതിന് ആവശ്യമായ സെറോടോണിൻ ഹോർമോണുകൾ മസ്തിഷ്കത്തിലാണ് ഉല്പാദിപ്പിക്കപ്പെടുന്നത്. ദഹനവുമായി ബന്ധപ്പെട്ട പ്രവർത്തനങ്ങളെ സഹായിക്കുന്ന സെറോട്ടോണിൻ ഹോർമോണുകൾ ഉദരത്തിൽ ഉത്പാദിപ്പിക്കുന്നവയാണ്.
3. ഓക്സിടോസിൻ :
ഓക്സിടോസിൻ ഹോർമോണുകളുടെ മറ്റൊരു പേര് ‘ലവ് ഹോർമോൺ’ എന്നാണ്. നിങ്ങളുടെ പ്രിയപ്പെട്ടവരുമായി അടുപ്പം നിലനിര്ത്താന് സഹായിക്കുന്ന ഹോര്മോണാണ് ഓക്സിടോസിന്. ശാരീരിക വേദനകൾ കുറയ്ക്കുക, മാനസിക സമ്മര്ദ്ധത്തിന് അയവ് നൽകുക, മനസുഖം നൽകുക തുടങ്ങിയ പല ഗുണങ്ങളും ഇതിനുണ്ട്. ഒരു കുഞ്ഞ് ജനിക്കുമ്പോൾ തുടങ്ങി രക്ഷാകർതൃ – ശിശു ബന്ധത്തിൽ ഇത് ശക്തമായ പങ്ക് വഹിക്കുന്നുണ്ട്. ഒരാൾ ആലിംഗനം ചെയ്യുമ്പോഴും ചുംബിക്കുമ്പോഴുമെല്ലാം ഈ ഹോർമോൺ ശരീരത്തിൽ നിന്ന് പുറപ്പെടുവിക്കപ്പെടുകയും അതുമൂലം ബന്ധത്തിൽ വിശ്വാസവും സ്നേഹവും പ്രോത്സാഹിപ്പിക്കപ്പെടുകയും ചെയ്യുന്നു.
4. എൻഡോർഫിനുകൾ :
എൻഡോർഫിനുകൾ ശരീരത്തിലെ സ്വാഭാവികമായ വേദനസംഹാരികൾ ആണെന്നാണ് പറയപ്പെടുന്നത്. ഇഷ്ടമുള്ള ഭക്ഷണം കഴിക്കുക, കുടിക്കുക, ജോലി ചെയ്യുക തുടങ്ങിയ പ്രതിഫലം നൽകുന്ന പ്രവർത്തികളിൽ ഏർപ്പെടുമ്പോൾ നിങ്ങളുടെ ശരീരത്തിൽ കൂടുതൽ എൻഡോർഫിൻ ഹോർമോണുകൾ ഉൽപാദിപ്പിക്കപ്പെടുന്നു. ഇത് നമ്മുടെ ശരീരത്തിനൊരു വേദന സംഹാരിയാണ്. ഇത് നമ്മുടെ സമ്മർദ്ധവും അസ്വസ്ഥതകളുമെല്ലാം ഒരു പരിധിവരെ കുറയ്ക്കാൻ സഹായിക്കും. എൻഡോർഫിനുകൾ കൂടുതൽ ഉൽപ്പാദിക്കപ്പെടുന്നതിന് അനുസരിച്ച് സമ്മർദ്ദം ഉണ്ടാക്കുന്ന ഹോർമോണായ കോർട്ടിസോളിൻ്റെ അളവ് ശരീരത്തിൽ കുറയ്ക്കാൻ സാധിക്കുന്നു. ഇത് സമ്മർദ്ദത്തെ കുറച്ചുകൊണ്ട് മനസ്സിന് സന്തോഷാനുഭവം പകരുന്നു.
ഈ ഹോർമോണുകളെല്ലാം ശരീരത്തിൽ എങ്ങനെ വർദ്ധിപ്പിക്കാം?
1. പുറത്തേക്കിറങ്ങുക
പുറത്തേക്കിറങ്ങി അല്പം സൂര്യപ്രകാശമേൽകുകയും ശുദ്ധവായുവും ശ്വസിക്കുകയും ചെയ്യുക. സൂര്യപ്രകാശം ചർമ്മത്തിൽ പ്രതിഫലിപ്പിക്കുന്നത് വഴി സെറോടോണിൻ, എൻഡോർഫിനുകൾ എന്നിവയുടെ പ്രകാശനം വർദ്ധിപ്പിക്കാൻ സാധിക്കും. നിങ്ങളുടെ സന്തോഷത്തിന് അത്യന്താപേക്ഷിതമായ ഈ ഹോർമോണുകൾേ വേണ്ടത്ര ലഭിക്കുന്നതിനായി നിങ്ങൾക്ക്, ജോഗിങ്ങ്, കടൽത്തീര വിശ്രമം, സൺ ബാത്ത്, വളർത്തുമൃഗങ്ങളുമായി നടക്കാൻ ഇറങ്ങുക. ഇടയ്ക്കൊക്കെ ഒരു പിക്നികിന് പോകുക തുടങ്ങിയ കാര്യങ്ങൾ പരീക്ഷിക്കാം.
2. കുടുംബത്തോടും സുഹൃത്തുക്കളോടൊപ്പം ചിരിക്കുക
ചിരിക്കുന്നത് നിങ്ങളുടെ ശരീരത്തിന് അത്ഭുതകരമായ മാറ്റങ്ങൾ ഉണ്ടാക്കുന്നതിന് സഹായിക്കും. ചിരി നിങ്ങളുടെ ശരീരത്തിൽ എൻഡോർഫിൻ ഹോർമോണുകളെ ഏറ്റവും എളുപ്പത്തിൽ വർദ്ധിപ്പിക്കുന്ന ഒന്നാണ്. ഇത് നിങ്ങളുടെ പ്രിയപ്പെട്ടവരുമായി ഏറ്റവും നല്ല ബന്ധം പുലർത്താൻ സഹായിക്കുകയും ചെയ്യും.
3. നിങ്ങളുടെ ഹോബികൾ ചെയ്യാൻ കുറച്ച് സമയം കണ്ടെത്തുക
നിങ്ങൾ ചെയ്യാൻ താൽപ്പര്യപ്പെടുന്ന കാര്യങ്ങൾ കൂടുതൽ ചെയ്യുന്നത് വഴി ഡോപാമൈൻ, സെറോടോണിൻ, എൻഡോർഫിൽ എന്നീ ഹോർമോണുകൾ കൂടുതൽ ഉൽപാദിപ്പിക്കപ്പെടുന്നു. ഇത് നിങ്ങളുടെ സമ്മർദ്ദം കുറച്ചുകൊണ്ട് നിങ്ങളെ സന്തോഷകരമാക്കി മാറ്റിയെടുക്കാൻ സഹായിക്കും.
4. ധ്യാനിക്കുക
ധ്യാനം ആരോഗ്യപരമായ നിരവധി ഗുണങ്ങൾ ഒരാൾക്ക് സമ്മാനിക്കുന്നു. ഇത് സന്തോഷ ഹോർമോണുകൾ പുറപ്പെടുവിച്ചുകൊണ്ട് ഒരാളെ ഏറ്റവും നന്നായി ഉറങ്ങാൻ അനുവദിക്കുകയും അയാളുടെ സമ്മർദ്ദവും വേവലാതിയും മികച്ച രീതിയിൽ ഒഴിവാക്കാൻ സഹായിക്കുകയും ചെയ്യുന്നു. ദിവസവുമുള്ള ധ്യാന ശീലം വഴി നിങ്ങളുടെ രക്തപ്രവാഹത്തിൽ കൂടുതൽ എൻഡോർഫിനുകളെ പുറപ്പെടുവിക്കാൻ കഴിയും, അത് നിങ്ങളുടെ മനസ്സിനെ ശാന്തവും സന്തോഷകരവുമാക്കുന്നു.
