ന്യൂഡല്ഹി : ഇന്ത്യയില് കൊറോണയുടെ രണ്ട് തരംഗങ്ങളിലും നിന്നും വ്യത്യസ്തമായി ഇത്തവണ പ്രായം കുറഞ്ഞ ആളുകളാണ് രോഗബാധിതരാകുന്നതെന്ന് ഇന്ത്യന് കൗണ്സില് ഓഫ് മെഡിക്കല് റിസര്ച്ച് നടത്തിയ സര്വേ വെളിപ്പെടുത്തുന്നു. ഇതിനാവശ്യമായ വിവരങ്ങള് രാജ്യത്തുടനീളമുള്ള 37 ആശുപത്രികളില് നിന്നാണ് ശേഖരിച്ചതെന്ന് ഐസിഎംആര് ഡയറക്ടര് ജനറല് ഡോ ബല്റാം ഭാര്ഗവ പറഞ്ഞു.ശരാശരി 44 വയസ്സ് വരെയുള്ള ആളുകളെയാണ് മൂന്നാം തരംഗത്തില് കൊറോണ ബാധിച്ച് ആശുപത്രിയില് പ്രവേശിപ്പിച്ചത്. കഴിഞ്ഞ തരംഗങ്ങളില് ശരാശരി 55 വയസ്സുള്ള രോഗബാധിതരെയായിരുന്നു ആശുപത്രിയില് പ്രവേശിപ്പിച്ചിരുന്നത്. ഇക്കുറി വൈറസ് ബാധിക്കുന്നത് പ്രായം കുറഞ്ഞ ആളുകളെയാണെന്നാണ് കണക്കുകള് വ്യക്തമാക്കുന്നതെന്ന് ഐസിഎംആര് അറിയിച്ചു.
‘മറ്റ് ആരോഗ്യപ്രശ്നങ്ങളുള്ള യുവാക്കളെയും മദ്ധ്യവയസ്ക്കരെയുമാണ് മൂന്നാം തരംഗം ബാധിച്ചിരിക്കുന്നത്. കണക്കുകള് പ്രകാരം മൂന്നാം തരംഗത്തില് രോഗം ബാധിച്ച 46 ശതമാനം ആളുകള്ക്കും മറ്റ് ആരോഗ്യപ്രശ്നങ്ങള് ഉണ്ടായിരുന്നു. ചെറിയ പ്രായത്തില് തന്നെ ചിലര്ക്ക് പ്രതിരോധ ശേഷി തീരെ കുറഞ്ഞ അളവിലാണ് പ്രകടമായത്’ ഐസിഎംആര് ഡയറക്ടര് ജനറല് ഡോ ബല്റാം ഭാര്ഗവ വ്യക്തമാക്കി. നിലവില് ഇന്ത്യയില് മൂന്നാം തരംഗത്തിന്റെ തീവ്രത കുറഞ്ഞുകൊണ്ടിരിക്കുകയാണ്. രണ്ടാം തരംഗത്തിനെ അപേക്ഷിച്ച് മൂന്നാം തരംഗത്തില് മരണ നിരക്ക് വളരെ ഉയര്ന്ന് നില്ക്കുന്നു. മാത്രമല്ല, വൈറസ് ബാധിതനാകുന്ന ആളുകളില് ചിലര്ക്ക് മാത്രമാണ് കാര്യമായ ലക്ഷണങ്ങള് പ്രകടമാകുന്നത്.
ഇതെല്ലാം ഒന്ന്, രണ്ട് എന്നീ തരംഗങ്ങളില് നിന്നും മൂന്നാം തരംഗത്തെ വ്യത്യസ്തമാക്കുന്നൂ എന്നും ഡോ ബല്റാം ഭാര്ഗവ കൂട്ടിച്ചേര്ത്തു.മൂന്നാം തരംഗത്തില് സാധാരണ വൈറല് പനിയുമായി എത്തുന്ന ആളുകളാണ് കൂടുതലായും രോബാധിതരാകുന്നത്. മണം, രുചി എന്നിവ നഷ്ടപ്പെടുന്നവര് ചുരുക്കമാണ്. ശ്വാസ തടസ്സം, മൂക്കൊലിപ്പ്, തൊണ്ട വേദന, ചുമ എന്നിവയാണ് മൂന്നാം തരംഗത്തിലെ പ്രധാന രോഗലക്ഷണങ്ങള്. കൂടാതെ, മറ്റ് തരംഗങ്ങളില് ആളുകള് പ്രതിരോധത്തിനായി പാരസെറ്റമോള് അടങ്ങിയ മരുന്നുകള് കൂടുതലായി കഴിച്ചിരുന്നു. എന്നാല് താരതമ്യേന മൂന്നാം തരംഗത്തില് മരുന്നിന്റെ ഉപയോഗം കുറവായിരുന്നു.
