യുഎസ്: തിങ്കളാഴ്ച രാത്രി നല്ല തെളിഞ്ഞ ആകാശത്തുനോക്കിയാൽ വല്ലപ്പോഴും മാത്രം കാണാൻ സാധിക്കുന്ന ചാന്ദ്രവിസ്മയം നേരിൽ കാണാം. സൂപ്പർമൂൺ ബ്ലൂ മൂൺ എന്നറിയപ്പെടുന്ന ഈ പ്രതിഭാസം തിങ്കളാഴ്ച ഇന്ത്യൻ സമയം 11.56-ന് ആകാശത്ത് ദൃശ്യമാകും. സൂപ്പർമൂൺ മൂന്ന് ദിവസത്തോളം ആകാശത്ത് കാണാൻ കഴിയും.
ഭൂമിയുടെ ഭ്രമണ പഥത്തോട് ചന്ദ്രൻ ഏറ്റവും അടുത്തുനിൽക്കുന്ന സമയത്തെ പൂർണചന്ദ്രനാണ് സൂപ്പർമൂണെന്ന് അറിയപ്പെടുന്നത്. ഈ വർഷത്തെ ഏറ്റവും വലുതും തിളക്കമുള്ളതുമായ പൂർണചന്ദ്രന്മാരിൽ ഒന്നാണ് ഇത്തവണത്തെ സൂപ്പർമൂൺ. നാല് പൂർണചന്ദ്രന്മാരുള്ള ഒരു സീസണിലെ മൂന്നാമത്തെ പൂർണചന്ദ്രനാണ് ബ്ലൂ മൂൺ എന്നറിയപ്പെടുന്നത്. രണ്ട് പൗർണമികളുള്ള മാസത്തിലെ രണ്ടാം പൗർണമിയെയും ബ്ലൂ മൂൺ എന്ന് വിളിക്കാറുണ്ട്.
ബ്ലൂ മൂൺ എന്നാണ് പേരെങ്കിലും ചന്ദ്രന് നിലനിറമുണ്ടാകില്ല. സീസണിലെ മൂന്നാമത്തെ പൂർണചന്ദ്രനും ഭൂമിയുടെ അടുത്തു നിൽക്കെ ദൃശ്യമാകുന്ന പൂർണചന്ദ്രനും ആയതുകൊണ്ടാണ് ഇത്തവണത്തെ പ്രതിഭാസത്തെ ‘സൂപ്പർമൂൺ ബ്ലൂ മൂണെ’ന്ന് വിളിക്കുന്നത്. സ്റ്റർജൻ മൂണെന്നും ഇതിനെ വിളിക്കും. സെപ്റ്റംബർ 17, നവംബർ 15, ഒക്ടോബർ 17 എന്നീ ദിവസങ്ങളിലെ ചന്ദ്രനും സൂപ്പർമൂണായിരിക്കും. സെപ്റ്റംബർ 17-ലെ ചന്ദ്രന്റെ ഒരുഭാഗത്ത് ഭൂമിയുടെ നിഴലേൽക്കുന്നതിനാൽ പകുതി മറഞ്ഞിരിക്കും.
