കോട്ടയം: ലോക്ക് ഡൗണ് നിയന്ത്രങ്ങള് ലംഘിച്ച് പാസും ടോക്കണുമില്ലാതെ മദ്യം വിറ്റ നഗരമധ്യത്തിലെ അഞ്ജലി പാര്ക്ക് ഹോട്ടല് അടച്ചുപൂട്ടി. അനധികൃതമായി മദ്യം വില്ക്കുന്നതായി പരാതി ഉയര്ന്ന സാഹചര്യത്തില് എക്സൈസ് നടത്തിയ പരിശോധനയില് ക്രമക്കേട് കണ്ടെത്തിയതോടെയാണ് അഞ്ജലി പാര്ക്ക് അടച്ചു പൂട്ടിയത്. ഹോട്ടലിനെതിരെ കേസും രജിസ്റ്റര് ചെയ്തിട്ടുണ്ട്.
മദ്യശാലകള് വഴിയുള്ള വില്പ്പന സര്ക്കാര് ആരംഭിച്ചപ്പോള് മുതല് തന്നെ അഞ്ജലി പാര്ക്ക് ഹോട്ടലിനെതിരെ പരാതി ഉയര്ന്നിരുന്നു. വെള്ളിയാഴ്ച ഉച്ചയോടെ പാസില്ലാത്തവര്ക്കു മദ്യം വില്ക്കുന്നതായി എക്സൈസ് സംഘത്തിനു വിവരം ലഭിക്കുകയായിരുന്നു. തുടര്ന്നു നടത്തിയ പരിശോധനയിലാണ് ക്രമക്കേട് കണ്ടെത്തിയത്.
വെര്ച്വല് ക്യൂവും ടോക്കണുമില്ലാതെ മദ്യം വിറ്റതിനെ തുടര്ന്ന് അങ്കമാലി റെയില്വേ സ്റ്റേഷനു സമീപത്തെ സൂര്യ ഹോട്ടലിലെ ബാറും എക്സൈസ് അടപ്പിച്ചിരുന്നു. മദ്യവില്പ്പന പുനരാരംഭിച്ച വ്യാഴാഴ്ച ബാറില്നിന്നും അനധികൃതമായി മദ്യം വിറ്റതായി എക്സൈസ് അധികൃതര് പറഞ്ഞു. മദ്യ വില്പ്പന ലൈസന്സില് പറഞ്ഞിട്ടുള്ള നിബന്ധനകള് ലംഘിച്ചതിനാണ് കേസ്. ബാറിനു മുന്പില് വന് ജനക്കൂട്ടം ഒത്തുകൂടിയതിനെ തുടര്ന്ന് വ്യാഴാഴ്ച പോലീസെത്തി ഇവരെ നീക്കുകയായിരുന്നു.
