ന്യൂഡല്ഹി : അനധികൃത പാര്ക്കിംഗിനെതിരെ കര്ശന നടപടിയുമായി കേന്ദ്രസര്ക്കാര്. അനധികൃത പാര്ക്കിംഗ് വിവരം നല്കുന്നവര്ക്ക് 500 രൂപ പാരിതോഷികം പ്രഖ്യാപിച്ചിരിക്കുകയാണ് കേന്ദ്ര ഗതാഗത മന്ത്രി നിതിന് ഗഡ്കരി. റോഡുകളിലെ അനധികൃത പാര്ക്കിംഗ് ഒഴിവാക്കുന്നതിന് ശക്തമായ നടപടി കൊണ്ടുവരുന്നതിന്റെ ഭാഗമായാണ് പുതിയ നിര്ദ്ദേശം.
‘മോട്ടോര് വാഹന ചട്ടത്തില് ഇതിനായുള്ള പരിഷ്കരണം ഉടന് നടത്തും. പുതിയ രീതി യാഥാര്ത്ഥ്യമാകുമ്പോള് ചിത്രങ്ങള് സഹിതം വിവരം നല്കുന്നവര്ക്കാണ് പാരിതോഷികം ലഭിക്കുക. പിഴയായി വാഹന ഉടമയില് നിന്നും ഈടാക്കുന്ന തുകയുടെ പകുതി എന്ന നിലയ്ക്കാണ് 500 രൂപയുടെ പാരിതോഷികം. നിരത്തില് ഓരോ ദിവസവും കാറുകളുടെ എണ്ണം ഉയര്ന്ന് വരുന്ന സാഹചര്യത്തില് റോഡില് ശരിയായ വാഹനം പാര്ക്ക് ചെയ്യാത്ത അവസ്ഥ അധികൃതര്ക്ക് വലിയ തലവേദനയാണ് സൃഷ്ടിക്കുന്നത്’- നിതിന് ഗഡ്കരി പറഞ്ഞു.