പത്തനംതിട്ട : പത്തനംതിട്ട കാതോലിക്കേറ്റ് കോളജ് ഗ്രൗണ്ടില് നടക്കുന്ന 80-ാമത് സ്വാതന്ത്ര്യദിനാഘോഷ പരിപാടിയില് ടൂറിസം – സാംസ്കാരിക വകുപ്പ് മന്ത്രി പി.സി വിഷ്ണുനാഥ് ദേശീയപതാക ഉയര്ത്തി പരേഡിന് അഭിവാദ്യം സ്വീകരിക്കും. രാവിലെ എട്ടിന് പരിപാടികള് ആരംഭിക്കും. 8.45ന് പരേഡ് കമാന്ഡര് പരേഡിന്റെ നിയന്ത്രണം ഏറ്റെടുക്കും. തുടര്ന്ന് പരേഡ് കമാന്ഡര്ക്കൊപ്പം മന്ത്രി പരേഡ് പരിശോധിക്കും. പത്തനംതിട്ട ഡി.എച്ച്.ക്യു ക്യാമ്പിലെ കെ.എന് ബിജുലാല് ആണ് പരേഡ് കമാന്ഡര്. പരേഡ് മാര്ച്ച് പാസിന് ശേഷം മുഖ്യാതിഥി സ്വാതന്ത്ര്യദിന സന്ദേശം നല്കും. തുടര്ന്ന് സ്കൂള് വിദ്യാര്ഥികളുടെ സാംസ്കാരിക പരിപാടികള് നടക്കും.
പോലീസ്, എക്സൈസ്, ഫയര് ഫോഴ്സ്, ഫോറസ്റ്റ് എന്നീ വകുപ്പുകളും എസ്.പി.സി, എന്.സി.സി, സ്കൗട്ട് ആന്റ് ഗൈഡ്സ്, ജെ.ആര്.സി, ബാന്ഡ് എന്നിവയും ഉള്പ്പെടെ 21 പ്ലറ്റൂണുകള് ചടങ്ങില് അണിനിരക്കും. മികച്ച പ്രകടനം കാഴ്ചവെയ്ക്കുന്ന ഗ്രൂപ്പുകള്ക്കുള്ള സമ്മാനദാനം മന്ത്രി നിര്വഹിക്കും. സ്വാതന്ത്ര്യദിനാഘോഷ ചടങ്ങുകള് വീക്ഷിക്കുന്നതിന് പൊതുജനങ്ങള് രാവിലെ 7.30ന് കോളേജ് ഗ്രൗണ്ടില് എത്തണമെന്ന് ജില്ലാ കളക്ടര് എ.നിസാമുദ്ദീന് അറിയിച്ചു. എല്ലാ സ്ഥാപനങ്ങളും വീടുകളും വ്യാപാര സ്ഥാപനങ്ങളും കൊടിതോരണങ്ങളാല് അലങ്കരിക്കുകയും ദേശീയ പതാക ഉയര്ത്തുകയും ചെയ്യണമെന്നും അദ്ദേഹം നിര്ദേശിച്ചു.
