മുബൈ : ഇന്ത്യയില് പ്രവര്ത്തിക്കുന്ന ചൈനീസ് കമ്പനികള്ക്ക് ചൈനയില് നിന്നുള്ള ഇറക്കുമതികള്ക്ക് അനുമതികള് വൈകുന്നുവെന്ന് റിപ്പോര്ട്ട്. ബിഐഎസ് പോലുള്ള ഏജന്സികളുടെ അനുമതി ചൈനീസ് കമ്പനികള്ക്ക് വൈകുന്നതായി ദേശീയ വാര്ത്താ ഏജന്സി റിപ്പോര്ട്ട് ചെയ്യുന്നു.
ഇതുമൂലം ഇന്ത്യയില് പ്രവര്ത്തിക്കുന്ന പല ചൈനീസ് കമ്പനികള്ക്കും മൊബൈല് അടക്കം തങ്ങളുടെ ഉല്പ്പന്നങ്ങള് ഏറെ വൈകിയാണു ലഭിക്കുന്നത്. അതിര്ത്തിയിലെ ചൈനീസ് പ്രകോപനത്തിനു തിരിച്ചടിയായി രാജ്യത്തെ ചൈനീസ് ഉത്പന്നങ്ങളുടെ ഇറക്കുമതിയില് സ്വീകരിക്കുന്ന കര്ശന നിലപാടുകളുടെ ഫലമാണ് ഇതെന്നും ചൂണ്ടിക്കാണിക്കപ്പെടുന്നു. ഇറക്കുമതിയിലൂടെ രാജ്യത്ത് എത്തുന്ന ഗുണനിലവാരം ഇല്ലാത്ത സാധനങ്ങളുടെ വരവ് തടയുമെന്നും ഗുണനിലവാരം ഉറപ്പാക്കുമെന്നും കേന്ദ്രം നേരത്തെ തന്നെ വ്യക്തമാക്കിയിരുന്നു. ചൈനീസ് വാണിജ്യ വിദേശകാര്യ മന്ത്രാലയങ്ങളും ഇതേപറ്റി പ്രതികരിച്ചില്ല.
കളിപ്പാട്ടങ്ങള്, ഗൃഹോപകരണങ്ങള് തുടങ്ങിയവയുടെ ഇറക്കുമതിക്ക് ലൈസന്സ് നിര്ബന്ധമാക്കുമെന്നും ദേശീയ മാധ്യമങ്ങള് റിപ്പോര്ട്ട് ചെയ്യുന്നു. ഉത്പന്നങ്ങള്ക്ക് സ്റ്റാന്റേര്ഡ് സര്ട്ടിഫിക്കറ്റ് ഉറപ്പു വരുത്താനുള്ള കാലതാമസമാണ് ഉത്പന്നങ്ങള്ക്കുള്ള ഇറക്കുമതി അനുമതി വൈകുന്നതിലുള്ള പ്രധാനകാരണം. പല ചൈനീസ് ഉത്പന്നങ്ങളും തുറമുഖങ്ങളില് കെട്ടികിടക്കുകയാണ്. ചൈനയില് നിന്നുള്ള ഇറക്കുമതി പരിമിതപ്പെടുത്തുന്നതിന്റെ ഭാഗമായി സര്ക്കാര് കസ്റ്റംസ് ഡ്യൂട്ടി വര്ധിപ്പിക്കുമെന്നും റിപ്പോര്ട്ടുകള് ഉണ്ടായിരുന്നു.
