കൊച്ചി : കോവിഡ് വ്യാപനം മൂലം ഇന്ത്യന് വിദ്യാര്ഥികളുടെ ചൈനയിലെ മെഡിക്കല് പഠനം മുടങ്ങിയ സാഹചര്യത്തില് ഇന്ത്യന് മെഡിക്കല് കോളജുകളില് ഇന്റേണ്ഷിപ് ചെയ്യാന് അനുവദിക്കണമെന്ന ഹര്ജിയില് ഹൈകോടതി കേന്ദ്രസര്ക്കാറിന്റെ വിശദീകരണം തേടി. ഹൈകോടതി രജിസ്ട്രിയുമായി ആലോചിച്ച് ദേശീയ മെഡിക്കല് കമീഷന് ഇ-മെയിലില് നോട്ടീസ് നല്കാന് ജസ്റ്റിസ് പി.വി കുഞ്ഞികൃഷ്ണന് ഹര്ജിക്കാരോടും നിര്ദേശിച്ചു. വിദേശ സര്വകലാശാലകളിലെ മെഡിക്കല് വിദ്യാര്ഥികളുടെ രക്ഷാകര്തൃ സംഘടന നല്കിയ ഹര്ജിയിലാണ് ഉത്തരവ്. ഹര്ജി വീണ്ടും ഏപ്രില് നാലിന് പരിഗണിക്കാന് മാറ്റി.
ചൈനീസ് സര്വകലാശാലകള് ഓണ്ലൈന് ക്ലാസുകള് തുടങ്ങിയെങ്കിലും ദേശീയ മെഡിക്കല് കമീഷന് ഇതിന് അംഗീകാരം നല്കിയില്ല. അതേസമയം, ഇന്ത്യന് കോളജുകള്ക്ക് ഓണ്ലൈന് ക്ലാസിന് അനുമതി നല്കുകയും ചെയ്തു. ഇത് വിവേചനപരമാണെന്നാണ് ഹര്ജിയിലെ വാദം. ലോകാരോഗ്യസംഘടന അംഗീകരിച്ച ആശുപത്രികളില് ഇന്റേണ്ഷിപ് ചെയ്യാന് ചൈനീസ് സര്വകലാശാലകള് അനുമതി നല്കിയിട്ടുണ്ടെങ്കിലും ദേശീയ മെഡിക്കല് കമീഷന് ഇതും അനുവദിക്കുന്നില്ലെന്ന് ഹര്ജിയില് പറയുന്നു.
