കവിയൂർ : സ്ത്രീകളുടെ ശക്തിയും ധൈര്യവും ത്യാഗവും സ്നേഹവും ആദരിക്കുന്ന സമൂഹമായി നാം മാറണമെന്നും സ്ത്രീ കുടുംബത്തിന്റെ ഹൃദയവും സമൂഹത്തിന്റെ ശക്തിയുമാണെന്നും അമ്മയായും സഹോദരിയായും ഭാര്യയായും സുഹൃത്തായും അധ്യാപികയായും നേതാവായും അവർ ലോകത്തെ മനോഹരമാക്കുന്നുവെന്നും സംസ്ഥാന വനിതാ കമ്മീഷൻ അംഗം അഡ്വ.എലിസബേത്ത് മാമ്മൻ മത്തായി പറഞ്ഞു. സ്ത്രീകളെ ആദരിക്കുകയും അവരുടെ അവകാശങ്ങൾ സംരക്ഷിക്കുകയും സമത്വം ഉറപ്പാക്കുകയും ചെയ്യേണ്ടത് സമൂഹത്തിന്റെ പൊതുവായ കടമയാണെന്നും അവർ പറഞ്ഞു.
വൈ.എം.സി.എ സൗത്ത് വെസ്റ്റ് ഇന്ത്യ റീജിയനും വനിതാ ഫോറവും സംയുക്തമായി കവിയൂർ വൈ.എം.സി.എയിൽ സംഘടിപ്പിച്ച അന്തർദേശീയ വനിതാ ദിനാഘോഷവും വനിതാ സംഗമവും ഉദ്ഘാടനം നിർവ്വഹിക്കുകയായിരുന്നു അവര്. വനിതാ ഫോറം സംസ്ഥാന അധ്യക്ഷ ജൂലി അനിൽ അധ്യക്ഷത വഹിച്ചു. വൈ.എം.സി.എ കേരള റീജിയൺ ചെയർമാൻ പ്രൊഫ.അലക്സ് തോമസ് മുഖ്യാതിഥിയായിരുന്നു. ദേശീയ വൈ.ഡബ്ല്യു.സി.എ വൈസ് പ്രസിഡന്റ് ഡോ.ആനി തോമസ് മുഖ്യപ്രഭാഷണം നടത്തി. സംസ്ഥാന സ്ത്രീ ശക്തി അവാർഡ് ജേതാവ് അഡ്വ.സീന സാറാ മജ്നുവിനെ ചടങ്ങിൽ ആദരിച്ചു.
വനിതാ ഫോറം ജനറൽ കൺവീനർ സുജ ജോൺ, റീജണൽ യൂത്ത്, വിമൺ ആൻഡ് ചിൽഡ്രൻസ് കൺസേൺ കമ്മിറ്റി ചെയർമാൻ ലിനോജ് ചാക്കോ, സംസ്ഥാന സെക്രട്ടറി ഡോ.റെജി വർഗീസ്, സബ് റീജൻ ജനറൽ കൺവീനർ സുനിൽ മറ്റത്ത്, വനിതാ ഫോറം കൺവീനർ ശാന്തി വിൽസൺ, ജോ ഇലത്തിമൂട്ടിൽ, കവിയൂർ വൈ.എം.സി.എ പ്രസിഡന്റ് ജേക്കബ് മാത്യു, സെക്രട്ടറി കെ.സി.മാത്യു എന്നിവർ പ്രസംഗിച്ചു. വിവിധ രംഗങ്ങളിൽ മികവ് തെളിയിച്ച കവിയൂർ ഗ്രാമ പഞ്ചായത്ത് പ്രസിഡന്റ് ഗീതാ അപ്പുക്കുട്ടൻ, സി.ഡി.എസ് ചെയർപേഴ്സൺ സുക്ഷമ പി. ഡേവിഢ്സൺ, ഓട്ടോറിക്ഷ ഡ്രൈവർ സിന്ധു അനിൽ, റെയ്മോൾ ജോൺസൺ, ഗ്രേസി മാത്യു, ഡോ.ഷേർലി ഫിലിപ്പ്, സ്റ്റെല്ലാ വർഗീസ്, സലാമ്മ ജോൺ, സിനി മോൾ എന്നിവരെ ചടങ്ങിൽ ആദരിച്ചു.
