തിരുവനന്തപുരം : കോവിഡ് വ്യാപനം അതിരൂക്ഷമായ തലസ്ഥാനത്ത് കോവിഡ് പ്രോട്ടോകോള് ലംഘിച്ച് ജലഅതോറിറ്റി ആസ്ഥാനത്ത് ഇന്റര്വ്യു നടത്തിയെന്നു പരാതി. ക്വാളിറ്റി കണ്ട്രോള് ഡിവിഷനുകള്ക്കു കീഴില് വിവിധ തസ്തികകളിലേക്ക് ഇന്നലെ വെള്ളയമ്പലം ജലഭവനിലെ ക്വാളിറ്റി കണ്ട്രോള് സബ് ഡിവിഷന് ഓഫീസില് രാവിലെ 10 മുതല് 2 വരെയായിരുന്നു ഇന്റര്വ്യു. വൈകീട്ട് 5 മണിയോടെയാണ് നടപടികള് അവസാനിച്ചത്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം ജില്ലകളിലേക്ക് ക്വാളിറ്റി മാനേജര്, ടെക്നിക്കല് മാനേജര്, ഡേറ്റ എന്ട്രി ഓപ്പറേറ്റര്, ലാബ് അറ്റന്ഡന്റ്, സാംപ്ലിങ് അറ്റന്ഡന്റ് തസ്തികകളിലേക്കാണ് ഇന്റര്വ്യു നടത്താന് നിശ്ചയിച്ചത്. ഇന്നലെ തിരുവനന്തപുരം പത്തനംതിട്ട ജില്ലകളിലായിരുന്നു ഇന്റര്വ്യു നടന്നത്. തിരുവനന്തപുരം ഡിവിഷനിലേക്ക് ജലഭവനില് നടത്തിയ ഇന്റര്വ്യൂവില് വനിതകള് ഉള്പ്പെടെ 250ല്പ്പരം പേരാണ് എത്തിയത്. എണ്ണം കൂടിയതോടെ അധികൃതര് ആശങ്കയിലായി.