ആപ്പിൾ ആരാധകരുടെ ഐഫോൺ എന്ന സ്വപ്നം കുറഞ്ഞ നിരക്കിൽ സാക്ഷാത്കരിക്കുന്ന എസ്ഇ (സ്പെഷ്യൽ എഡിഷൻ) സീരീസിലേക്ക് ഒരു ഫോൺകൂടി എത്തുന്നു. ആപ്പിൾ ഐഫോൺ എസ്ഇ 4 ( iPhone SE 4 ) വിപണിയിലേക്ക് എത്തിക്കാൻ ഒരുങ്ങുകയാണ് ആപ്പിൾ. ബജറ്റ് സൗഹൃദ സ്മാർട്ട്ഫോണായി ആപ്പിൾ കഴിഞ്ഞവർഷം ഐഫോൺ എസ്ഇ 3 അവതരിപ്പിച്ചിരുന്നു.വിപണിയിൽ കാര്യമായ തരംഗം സൃഷ്ടിക്കുന്നതിൽ 2022ൽ പുറത്തിറങ്ങിയ ഐഫോൺ എസ്ഇ 3 പരാജയപ്പെട്ടു. എന്നാൽ പരാജയത്തിൽ നിന്ന് പാഠം ഉൾക്കൊണ്ടുകൊണ്ട് പുതിയ മാറ്റങ്ങൾ വരുത്തിയാവും ഫോൺ എത്തുക. പതിവ് ചട്ടക്കൂടുകളിൽനിന്ന് ഒട്ടേറെ മാറ്റങ്ങളുമായി എത്തുന്ന ഒരു ഗെയിം ചേഞ്ചർ സ്മാർട്ട്ഫോണായിരിക്കും പുതിയ ഐഫോൺ എസ്ഇ 4. ഐഫോൺ 14 ന് സമാനമായ ഡിസൈനാണ് ഐഫോൺ എസ്ഇ 4ന് ആപ്പിൾ നൽകുന്നത്. ആപ്പിളിന്റെ സമീപകാല ഡിസൈൻ ചോയ്സുകളുമായി യോജിപ്പിച്ച് പുതിയ ഐഫോൺ എസ്ഇ 4ൽ ഹോം ബട്ടൺ ഒഴിവാക്കും എന്നതാണ് ഏറ്റവും ശ്രദ്ധേയമായ മാറ്റങ്ങളിലൊന്ന്.
ഐഫോൺ എസ്ഇ 4 ന്റെ ഭാരം 165 ഗ്രാം ആയിരിക്കുമെന്നാണ് പ്രതീക്ഷിക്കുന്നത്. ഇത് ഐഫോൺ 14 ന്റെ ഭാരത്തേക്കാൾ 6 ഗ്രാം കുറവാണ്. സൈഡ് ബട്ടണിലെ ടച്ച് ഐഡിക്ക് പകരം ഫേസ് ഐഡി നൽകുമെന്നും ഐഫോൺ 15ന്റെ ഡിസൈൻ ചോയ്സുകളെ പ്രതിഫലിപ്പിക്കുന്ന ലെറ്റ്നിങ് കണക്ടറിന് പകരം യുഎസ്ബി-സി പോർട്ട് വരുമെന്നും റിപ്പോർട്ട് അവകാശപ്പെടുന്നു. 2024-ൽ ഐഫോൺ എസ്ഇ 4 ലോഞ്ച് ചെയ്യപ്പെടാൻ സാധ്യതയുള്ളതായി ചില ഓൺലൈൻ റിപ്പോർട്ടുകൾ പറയുന്നു. ഐഫോണ് പതിനാലിന് സമാനമായിരിക്കും ഈ ഫോണ്. പല ഫീച്ചറുകളും വിവിധ ഐഫോണുകളില് നിന്നായി വരും. ഐഫോണ് പതിനാലിന്റെ ബേസ് മോഡല് പോലെയുണ്ടാവും എസ്ഇ4.
