പുതുപ്പള്ളി : അന്തരിച്ച മുൻ മുഖ്യമന്ത്രി ഉമ്മൻ ചാണ്ടിയുടെ ഫ്ലക്സ് ബോർഡുകൾ കീറുന്നതോ കത്തിക്കുന്നതോ ആയ നടപടികളിൽ കോൺഗ്രസ് പ്രവർത്തകർക്ക് പങ്കില്ലെന്ന് ചാണ്ടി ഉമ്മൻ. അത്തരത്തിൽ പ്രവർത്തിക്കുന്നവർ കോൺഗ്രസുകാരല്ലെന്നും പാർട്ടിക്ക് പുറത്തുള്ളവരാണ് ഇത്തരം പ്രവർത്തികൾക്ക് പിന്നിലെന്നും അദ്ദേഹം പറഞ്ഞു. പുറത്ത് പ്രതിഷേധ പ്രകടനങ്ങൾ നടത്തുന്ന കോൺഗ്രസ് പ്രവർത്തകർ സംയമനം പാലിക്കണമെന്ന് ചാണ്ടി ഉമ്മൻ അഭ്യർത്ഥിച്ചു. പ്രവർത്തകർ നിയന്ത്രണം വിട്ടാൽ അത് മുതലെടുക്കാൻ മറ്റുള്ളവർ ശ്രമിക്കുമെന്നും അദ്ദേഹം മുന്നറിയിപ്പ് നൽകി.
കഴിഞ്ഞ ദിവസങ്ങളിൽ തന്റെ പിതാവിനെതിരെ സോഷ്യൽ മീഡിയയിൽ വന്ന മോശമായ കമന്റുകളെക്കുറിച്ച് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഫേസ്ബുക്കിൽ ഉമ്മൻ ചാണ്ടിയെക്കുറിച്ച് മോശം പരാമർശം നടത്തിയ വ്യക്തി മറ്റൊരു രാഷ്ട്രീയ പാർട്ടിയിൽപ്പെട്ടയാളാണെന്ന് പരിശോധനയിൽ വ്യക്തമായതായി അദ്ദേഹം പറഞ്ഞു. തിരഞ്ഞെടുപ്പിലുണ്ടായ വലിയ പരാജയത്തിന് പിന്നാലെ ഇത്തരം പ്രവർത്തികളിലൂടെ ചിലർ ‘റിലാക്സേഷൻ’ കണ്ടെത്താൻ ശ്രമിക്കുകയാണെന്നും നമ്മൾ അതിന് അവസരം നൽകരുതെന്നും ചാണ്ടി ഉമ്മൻ ആവശ്യപ്പെട്ടു.
