കോഴിക്കോട് : നഗരത്തിലെ കുണ്ടുങ്ങലില് കെ റെയില് കുറ്റികള് ജനങ്ങള് പിഴുതെറിഞ്ഞു. ശക്തമായ ജനകീയ സമരത്തിന് മുന്നില് നടപടികള് തുടരാനാവാതെ തഹസില് ദാറുടെ നേതൃത്വത്തിലുള്ള ഉദ്യോഗസ്ഥസംഘത്തിന് മടങ്ങേണ്ടി വന്നു. പല തവണ പോലീസും ജനങ്ങളും തമ്മില് ഉന്തുംതള്ളുമുണ്ടായി. പോലീസ് സംരക്ഷണയില് കുറ്റിയില് മാര്ക്ക് ചെയ്യാന് കൊണ്ടുവന്ന മഞ്ഞപ്പെയിന്റ് ജനങ്ങള് റോഡില് കളഞ്ഞു. രാവിലെ പത്ത് മുതല് ഒരുമണിവരെ പൊരിവെയിലില് ജനം പ്രതിരോധം തീര്ത്തു.
അസി. കമ്മീഷണര് ബിജുരാജിന്റെ നേതൃത്വത്തില് വന് പോലീസ് സംഘത്തിന്റെ സാന്നിധ്യത്തിലായിരുന്നു തിങ്കളാഴ്ച രാവിലെ കല്ലിടല് ആരംഭിച്ചത്. കുണ്ടുങ്ങലിലെ സര്ക്കാര് ഭൂമിയില് ആദ്യം കല്ലിട്ടപ്പോള് ജനം എതിര്ത്തില്ല. 11 മണിയോടെ കെ. റെയില് സമരനേതാവ് ടി.ടി. ഇസ്മായില്, ഡി.സി.സി പ്രസിഡന്റ് അഡ്വ. കെ. പ്രവീണ്കുമാര്, മുസ്ലീം ലീഗ് ജില്ലാ വൈസ് പ്രസിഡന്റ് കെ. മൊയ്തീന്കോയ, ബി.ജെ.പി ജില്ല പ്രസിഡന്റ് വി.കെ. സജീവന്, യുവമോര്ച്ച നേതാവ് പ്രകാശ്ബാബു തുടങ്ങിയവരുടെ നേതൃത്വത്തില് സമരം ശക്തമാക്കി. റവന്യു ഭൂമിയില് സ്ഥാപിച്ച മൂന്നു കല്ലുകളും പിഴുതെറിഞ്ഞു. തഹസില്ദാര് തിരിച്ചുപോവണമെന്നാവശ്യപ്പെട്ട് പലതവണ ജനങ്ങള് മുദ്രാവാക്യം വിളിച്ചു. പൊലീസ് സംയമനം പാലിച്ചു. ഉച്ചക്ക് ഒരു മണിയോടെ തഹസില് ദാര് കെ. ഹരീഷും സംഘവും പിരിഞ്ഞുപോയശേഷമാണ് സമരം അവസാനിച്ചത്.
